Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevtyń Jarlyǵymen Túrkistan qalasynyń oblys ortalyǵy mártebesine ıe bolýy jáne Mádenıet jáne sport mınıstrliginiń «Áziret Sultan» memlekettik tarıhı-mádenı qoryq-mýzeıi men tarıhı oryndardy zertteý, qaıta jańartý jáne qalpyna keltirýge arnalǵan jobasyna sáıkes serpindi jumys júrip jatqany belgili. Jyl basynan qarqyn alǵan arheologııalyq qazba jumystary birqatar tarıhı málimetterdiń betin ashyp, óz jemisin bere bastady. Respýblıkalyq, oblystyq buqaralyq aqparat quraldaryna tyń aqparattarmen bólisý maqsatynda 27 gektar aýmaqty alyp jatqan alǵashqy qalalyq qonystardyń biri Kúltóbe qalashyǵyndaǵy arheologııalyq qazba jumystary jáne ústi jabynmen qorshalǵan sıtadel jóninde áńgimelegen mınıstr «Kúltóbe qalashyǵynyń tarıhı nysandaryn qalpyna keltirý» jobasyn júzege asyrýbyń 2019-2021 jyldarǵa kózdelgen josparlary jóninde de aıtty. San ǵasyrlyq tarıhqa baı tarıhı qala ornyna júrgizilgen zertteý jumystary jyldyń basynda Qoqan handyǵy kezeńine tán HIH ǵasyr qurylystaryn ashýmen baılanystyrylsa, kóktemniń alǵashqy aılarynda erte kezeńderdiń jádigerleriniń kóptep tabylýy jáne aǵymdaǵy aıda Túrgesh qaǵanaty dáýiriniń tıyny men IH ǵasyr dırhemi tabylýymen qundy. Iаsaýı ómir súrgen dáýirge deıin jasalatyn anyqtaý jumystarynan kútiletin nátıje kóp. Kúltóbe týrıster úshin ashyq aspan astyndaǵy ekspozısııalyq jáne arheologııalyq nysan retinde qyzmet atqarady.
Baspasóz tanystyrylymy Qarnaq aýylyndaǵy Taıqazannyń temirin balqytqan pesh ornynda jalǵasty. «Áziret Sultan» memlekettik tarıhı-mádenı qoryq-mýzeıiniń arheologııa bólimi júrgizip jatqan qazba jumystary ataqty qolbasshy Ámir Temirdiń buıryǵymen Temir ustalalary quıǵan Taıqazan temirin daıyndaǵan oryndy anyqtaǵan bolatyn. Tarıhı derekter boıynsha temir balqytqan sheberlerdi Tabrızıler dep ataǵan. Sheberlerdiń urpaǵymen júzdesip ata-babalarynyń kásibi jóninde pikir almasqan Arystanbek Muhamedıuly qazba ornynan anyqtalyp kele jatqan pesh ornyn kórdi.
Sonymen qatar, sáýlet óneri eskertkishi bolyp sanalatyn Shamet Ishan meshit-medresesimen tanysty. Qoja Ahmet Iаsaýı kesenesiniń naqyshyna uqsas etip jasalǵan meshit ǵımaraty negizgi namaz oqıtyn jáne qylýetti qamtıtyn kishi zaldardan, sharýashylyq bólmesinen turady. Tabrızıler urpaǵy ata-babalarynyń kásibin urpaqtan-urpaqqa jalǵystyrýymen qatar temirden jasalǵan kóne jádigerlerdi jınaqtap, medrese ishin mýzeı retinde paıdalanýda. Aralaý barysynda mınıstr Arystanbek Muhamedıuly meshit-medreseniń kúmbezine qaıta jańartý jumystaryn júrgizý úshin «Qazqaıtajańartý» kásipornynyń basshysyna birqatar tapsyrmalar júktedi.
Press-týr ortaǵasyrlyq Saýran qalashyǵynda jalǵasyp qupııasyn qoınyna jasyrǵan ejelgi shahardy týrıstik ortalyqqa aınaldyrý baǵytynda atqarylatyn jumystar boıynsha málimet berildi. Qazirgi tańda Saýran sapar ortalyǵynyń jobalyq qujattary ázirlený ústinde. Aldaǵy ýaqytta týrısterge qyzmet kórsetetin arnaıy ǵımarat pen jataqhana, qyzmetkerler men baqylaý oryndary syndy jobalar jasalynbaq.
- Bastamanyń alǵashqy qadamy retinde «Ońtústik ańyzdary» atty «Nomad Explorer» respýblıkalyq týrıstik ekspedısııasynyń qorytyndy gala-konsertiniń Saýran qalasy mańynda ótýiniń mańyzy erekshe, - dedi Arystanbek Muhamedıuly.
Bıznes-qurylym, zııaly qaýym ókilderi, otandyq shoý-bıznes juldyzdary, blogerler jáne BAQ ókilderinen quralǵan 1000-ǵa jýyq adam qatysqan sharaǵa da qatysqan mınıstr týrıstermen júzdesip, alǵysyn bildirdi.
