Forýmǵa memlekettik tildi jetik meńgergen etnos ókilderi men oblystyq assambleıa qurylymdary, etnomádenı birlestik tóraǵalary men músheleri jáne belsendi jastar qatysty.
Jıynda sóz alǵan oblystyq «Slavıane» qoǵamdyq-mádenı ortalyǵynyń múshesi Elena Pavlova: «Elbasy ózi usynǵan kandıdatýra – ol eldegi saıası baǵyttyń sabaqtastyǵy. Eldegi alǵa qoıǵan strategııalyq maqsattardyń bárine jetetin joldyń bireý ekendigi jáne soǵan tez jetetinimizdiń kepili esepteledi. Bir týdyń astynda, bir maqsatty ustanyp ómir súrip jatqandyqtan árbir saıası oqıǵaǵa asa mán beremiz. Eldiń bolashaǵy úshin óz tańdaýymyzdy jasaıtyn bolamyz», – dedi.
«Kezekten tys prezıdenttik saılaý halyqty toptastyrý jolyndaǵy patrıottyq akt bolyp, ekonomıkany turaqtandyrýǵa, eldiń qarqyndy damýy men azamattarymyzdyń ıgiliginiń túıindi máselelerin sheshý úshin qajetti azamattyq tatýlyqty, áleýmettik turaqtylyqty qamtamasyz etýge qýatty serpin beredi», dedi Nur Otan partııasynyń oblystyq «Jas Otan» jastar qanatynyń tóraǵasy Talǵat Tiles.
Sondaı-aq oblystyq «Jańǵyrý joly» JQ tóraǵasynyń orynbasary, oblystyq koreı jastar qozǵalysynyń tóraıymy Svetlana Pak, «Slavıane» qoǵamdyq-mádenı ortalyǵynyń múshesi, oblystyq «Jańǵyrý joly» JQ tóraǵasy Artem Koshman Qazaqstan Respýblıkasy Prezıdentiniń kezekten tys saılaýynyń ótkizilýiniń mańyzdylyǵyna toqtalyp, jastardy saılaýǵa belsendi qatysýǵa shaqyrdy.
«Kópultty Qazaqstan – bizdiń baqytymyz» degen sózdi Qazaqstannyń Tuńǵysh Prezıdenti – Elbasy Nursultan Ábishuly Nazarbaev únemi aıtyp keledi. Oǵan úlken sebep bar. Taǵdyrly sát – Qazaqstan óz aldyna táýelsizdigin alar tusta qazaqtar óz eli, óz jerinde qyryq paıyzǵa da jetpeıtin. Sol kezde osy jastardyń ata-babalary, áke-shesheleri jan-jaqqa bura tartpaı birtutas Qazaqstannyń irgeli el bolýyn qalap, bir týdyń astynan tabyldy.
Endi olardyń balalary da Qazaqstan Prezıdentin saılaý naýqanynda el keleshegi úshin jumylǵan judyryqtaı bir bolýdy qalap otyr.
Qyzylorda oblysy
