Baılyqtyń órkeýdeligi, ózimshildigi men ónerdiń kirshiksiz kelbetiniń ǵasyrlardan beri bir qazanǵa basy syıǵan emes. Áıtpese, HIH ǵasyrda Birjan sal baılyqtyń býyna maldanǵan shonjarlarǵa arnap ashý-yzaǵa toly «Janbota», «Adasqaq» ánderin shyrqar ma edi. Mundaı mysaldardy jipke tize berýge bolady. Biraq órkenıettiń órine shyqqan qazirgi zamanda da odan sabaq almaıtynymyz nelikten degen oıǵa qalasyz. Al ádiletsizdiktiń balalar arasyndaǵy básekege kóshýi tipti de kóz juma qaraıtyn dúnıe emes ekenin qalyń kórermenniń osy bir jan jabyrqatar jónsizdikke beıjaı qaramaǵanynan bilýge bolar.
Reseıdiń «Bala daýysy» án baıqaýynyń fınalyna deıin jetken qazaqstandyq Erjan Maqsym (Erjannyń anasy Gúlmıra Álibek ulynyń «Maksım» tegin burynǵy qujattardyń oryssha burmalanyp toltyrylýymen túsindirgen bolatyn, al biz ana tilimizdegi bastapqy nusqasy boıynsha jazdyq) búginde barsha otandastarymyzdyń, tipti reseılik tyńdarmandardyń iltıpatyna bólendi. Ekinshi orynǵa ıe bolǵan 12 jasar Erjan – Oral qalasynyń týmasy. Bul baıqaýda Erjan reseılik belgili kásipker Iаn Abramov pen tanymal ánshi Alsý Safınanyń qyzy Mıkellaǵa jol berdi. Alaıda shoýdyń qorytyndy sheshiminiń ádildigine kóptegen kórermenmen birge Reseı shoý-bıznesiniń ataqty juldyzdary da kúmánmen qarady.
Osylaısha, TMD keńistigine tez tanylyp úlgergen balaqaıdy elimizde erkeletip «baýyrsaq bala» dep te ataı bastady. Jýyrda Mádenıet jáne sport mınıstri A.Muhamedıuly jeńimpaz balany qabyldap qoshemet kórsetse, birqatar telearnalar men ınternet arnalar tikeleı suhbatqa da shaqyryp úlgerdi. Sondaı-aq Máskeýde jazda ótetin Mýz-TV arnasynyń konsertinde án aıtpaq. Iаǵnı, Erjan ekinshi oryn alǵanymen, erlep tur. Bul týraly aqparat quraldarynda keńinen jazylyp jatyr.
Iá, atalǵan baıqaýdyń qorytyndysyna, áleýmettik jelilerdegi áleýmettiń ár alýan pikirine zer sala otyryp, qazirgi qoǵamnyń tamyryn tap basýǵa bolady.
Eń bastysy, bul jerde ata-ananyń mahabbaty men ambısııasynyń arasy bir-aq qadam ekenin baıqaǵandaımyz. «Bala daýysy» baıqaýynyń jeńimpazy atanǵan qyzdyń ata-anasyna qalyń buqara ótkir syndy qarsha boratyp jatyr. Bul oryndy da. Sebebi barsha kórermen báıgede balalardyń ónerimen birge ata-ananyń ambısııasy da jarysqa túskenin kórdi. Al bala álemi – kirshiksiz álem. Osy baıqaýda oza shapqanymen kópshiliktiń kóńil tórinen oryn almaǵan soń bári beker bolmaq. Iаkı bala kóńiline qylaý tústi deýge bolady. Bul balaǵa qandaı sabaq?..
Ras, ómir – jyltyr jýrnaldardyń muqabasyndaǵydaı jarqyraǵan mereıli sátterden de tura bermeıtinin Mıkellanyń ata-anasy kesh ańdaǵan bolýy kádik. Áıtpese bir kezde ózi de ata-ananyń qarjylyq kapıtalymen shoý-bıznestiń shymyldyǵyn erkin túrgen Alsý balasynyń óner jolynda dál sondaı qadamdy qaıtalaýǵa barmas pa edi, kim bilsin?.. Biraq qazaqta «Uıada ne kórseń, ushqanda sony ilesiń» degen de támsil baryn tanymal otbasynyń tarıhynan kóremiz. Alma aǵashynan alysqa túspeıdi. Áleýmettik jelide pikir qaldyrýshylar reseılik sahnada ájeptáýir orny bar ánshiniń 20 jyl buryn «Evrovıdenıe» baıqaýynda júldeger bolýyna yqpal etken daýystyń da qoldan jasalǵanyn eske salady. Endi sońǵy daýly oqıǵadan keıin Alsýdyń bıylǵy «Evrovıdenıe» baıqaýyna qatysýshylardyń jınaǵan upaıyn málimdeıtin «Rossııa-1» telearnasyndaǵy mıssııasyna shekteý qoıyldy.
Mine, «ótiriktiń quıryǵy bir-aq tutam» degen osy. Shyndyqtyń bar ekenine kóz jetkizgen shýly oqıǵa onyń árdaıym keshigip júretinin de kórsetkendeı... Dese de, bul baıqaý budan keıin qampaıǵan qaltasyna sengen qaısybir qaýymnyń alshań basqan aıaǵyn ańdap basýyna alyp keledi degen úmitti oıatty. Bul aradaǵy basty jeńis te osy bolsa kerek.
Álbette, barlyq ata-ana balasynyń qatarynan kem bolǵanyn qalamaıdy. Qoly jetkenshe qurby-qurdastarynyń aldy bolýyna qam qylady. Alaıda, bir mezet balanyń da óz múmkindigin ózine qaldyrý kerek sııaqty...
Al Erjanymyz eldiń eri bolar kún alda!
