− Biz Qazaqstannyń keıingi tolqyn jastaryna ushý utqyrlyǵy men qoljetimdiligi qajet ekenin túsinemiz. Loýkosterdiń klassıkalyq úlgisi boıynsha jasalǵan FlyArystan der kezinde paıda boldy. Biz ishki jáne halyqaralyq baǵyttarda jolaýshylar aǵyny edáýir ósetinin boljadyq. Ýaqyt óte kele sheteldik áýejaılarmen baılanys ornatýdy kózdep otyrmyz. Biz óńirler ekonomıkasynyń qarqyndy ósýin baıqaımyz jáne osy damýdyń bir bóligi bolatynymyzǵa úmittenemiz», dedi «Eır Astana» áýe kompanııasynyń prezıdenti Pıter Foster. Atalǵan áýe kompanııasy bıyl 29 naýryzda Almaty-Taraz-Almaty, sondaı-aq Almaty-Oral-Almaty baǵyttary boıynsha bılet sata bastady. Keıinnen Almatydan Nur-Sultanǵa, Qaraǵandyǵa, Pavlodar men Shymkentke bılet satyla bastady. Búginde respýblıkanyń alty qalasyna áýe bıletteri satylýda.
FlyArystan áýe kompanııasy 2022 jyly 4 mln adamǵa deıin jolaýshy tasymaldaýdy kózdep otyr. Atalǵan áýe kompanııasynyń marketıng jáne satý bóliminiń dırektory Janar Jaılaýovanyń aıtýynsha, qazirgi ýaqytta nebári 2 ushaq áýe reısterin oryndaıdy.
− Qyrkúıek aıynda taǵy bir ushaq qosylady. Sondyqtan qaı óńirdiń áýejaıy ótinim beredi, sol baǵytqa qaraı reıs ashylady. Al jolaýshylardyń sanyna kelsek, bıyl jospar boıynsha FlyArystan áýe kompanııasynyń qyzmetin qoldanýshylardyń sany 700 myń adam bolady dep belgilep otyrmyz. Kelesi 2020 jyly 2,5 mln adam, al 2022 jyly 4 mln adamǵa jetkizemiz, – dedi J.Jaılaýova. FlyArystan áýe kompanııasy ókiliniń málimetinshe, búginge deıin 45 myńǵa jýyq bılet satyldy jáne onyń 85%-yn «bagajsyz» tarıfter quraıdy.
