Osy baǵytta qandaı jumystar atqaryldy? Alda qandaı jumystar josparlanǵan? Keshe Ortalyq kommýnıkasııalar qyzmetinde ótken arnaıy brıfıngte Energetıka mınıstrliginiń basshylyǵy osy týraly baıandady.
Búginde Qazaqstannyń barlyq elektr stansalarynyń jalpy qýaty 21 GVt-ǵa teń. «Qazaqstandyq kún energetıkasy qaýymdastyǵy» ZTB dırektorlar keńesiniń tóraǵasy Nurlan Qapenov osylaı dedi. Onyń aıtýynsha, 2018 jyldyń qorytyndysy boıynsha álemdik kún energetıkasynyń belgilengen qýaty 500 GVt-dan asty. 2018 jyldyń ishinde 100 GVt-dan astam qýat óndiretin fotoelektrlik stansalar salyndy.
N.Qapenovtiń aıtýynsha, ǵalamsharda elektr qýatyn óndirý úshin kún energııasyn paıdalanatyn 90 el bar. 32 elde 1 GVt-dan astam qýat óndiretin stansalar ornatylǵan. Kúnnen energııa óndiretin nysandardyń qýatyn 300-den 500 GVt-ǵa kóbeıtýge 2 jyl ýaqyt ketipti. Salystyrý úshin aıtar bolsaq, AES-terdiń qýaty shamamen 400 GVt-ny quraıdy. Bedeldi álemdik sarapshylar 2019 jyly álemde 129 GVt fotoelektrlik kún elektr stansalary salynady degen boljam jasap otyr.
Byltyr elimizde óndirilgen «jasyl» energııanyń kólemi 1,35 mlrd kVt-ǵa jetip, elektr energııasynyń jalpy kólemindegi úles salmaǵy 1,27 %-dy quraǵan bolatyn. Aldaǵy ýaqytta bul kórsetkish qarqyndy túrde ósýi tıis.
