Petropavl qalasynda dúnıege kelgen marqummen qoshtasý úshin Soltústik Qazaqstan óńirinen oblystyq máslıhat hatshysy Vladımır Býbenko bastaǵan delegasııa keldi. Sonymen qatar, qaraly jıynǵa Parlament Májilisiniń depýtattary, Energetıka vıse-mınıstri Suńǵat Esimhanov, oblys basshylyǵy jáne marqumnyń týǵan-týystary, jaqyndary men dostary qatysty.
Qoshtasý rásimine qatysqan qaýym Shaımerden Orazálınovtiń Qaraǵandyny qıyn-qystaý jyldary abyroımen basqarǵanyn, daǵdarystarǵa toıtarys berip, qala men onyń turǵyndaryn kommýnaldyq qıyndyqtardan alyp shyǵýda jáne basqa da tolyp jatqan problemalardy sheshýde eren eńbek sińirgenin tebirenispen eske aldy.
Shaımerden Orazálınov 1942 jyldyń 11 qarashasynda Petropavl qalasynda dúnıege kelgen. 1965 jyly Qaraǵandy polıtehnıkalyq ınstıtýtyn «Taý-ken ınjeneri» mamandyǵy boıynsha támamdady. Taý-ken salasynda qatardaǵy sheberden bastap ken-baıytý fabrıkasynyń dırektory laýazymyna deıin kóterilgen. 1984 jyly Qaraǵandy qalasynyń Oktıabr aýdany atqarýshy komıtetiniń tóraǵasy qyzmetine taǵaıyndaldy. Odan keıin 1987 jyldan 1997 jylǵa deıin on jyl qatarynan Qaraǵandy qalasynyń ákimi qyzmetin atqardy. Qaraǵandy oblysy ákimi janyndaǵy Tártiptik keńestiń tóraǵasy boldy.
Shaımerden Orazálınov eki ret Parlament Májilisiniń depýtaty bolyp saılanǵan. 2009 jyldan bastap qaıtys bolǵanǵa deıin Qazaqstan elektr energetıkalyq qaýymdastyǵynyń tóraǵasy qyzmetin atqardy.
