Búgin oblystyq Tilderdi damytý basqarmasy uıymdastyrǵan «Til tarıhy: júz jyldyq jylnama» atty pýblısıstıkalyq shyǵarmalar baıqaýynyń jeńimpazdary marapattaldy. Bir aı buryn jarııalanǵan baıqaýǵa jetisýlyq jýrnalıster, til men rýh janashyrlary qyzyǵýshylyqpen qatysyp, «Egemen Qazaqstan» gazetiniń ult tiliniń damýyna qosqan úlesi men qazaq rýhanııatyndaǵy ornyn saralaǵan shyǵarmalaryn usyndy.
Qazylar alqasynyń talqysyna túsken eńbekterdiń arasynan 5 avtordyń jumysy iriktelip, júldege ilikti. Nátıjesinde, basylymnyń 100 jyldyq mereıtoıyna oraı ótkizilgen «Til tarıhy: júz jyldyq jylnama» atty pýblısıstıkalyq shyǵarmalar baıqaýynyń 1-oryny oblystyq «Jetisu» gazetiniń tilshisi Bolat Májıtke buıyrdy. Al júldeli 2-oryndy jas jýrnalıst Dastan Qastaı qanjyǵasyna baılady. Sondaı-aq 3-oryndy «Jetisu» gazetiniń tilshisi Qajet Ańdas jeńip aldy. Budan soń, eki yntalandyrý syılyǵy «Qaratal» aýdandyq gazetiniń bas redaktory Ashat О́mirbaev pen «Jetisu» gazetiniń tilshisi Muhtar Kúmisbekke berildi.
Taldyqorǵanda ótken saltanatty jıyndy ashqan oblystyq Tilderdi damytý basqarmasynyń basshysy Aıdar Bashbaev qazaq tiliniń taǵdyrly tarıhyndaǵy baspasózdiń alatyn ornyn aıshyqtap, «Egemen Qazaqstan» gazetiniń ult damýy men til mádenıetin qalyptastyrýdaǵy ǵasyrlyq shejiresine toqtaldy. Jıynda basylym ardageri, kezinde gazette menshikti tilshi bolǵan aǵa býyn jýrnalıst Álı Ysqabaı, belgili syqaqshy Turlyhan Kárim jáne Núsipbaı Ábdirahym, Bolat Abaǵan syndy jetisýlyq maıtalman qalamgerler sóz alyp, bas basylymǵa 100 jyl tolýymen quttyqtady.
Sondaı-aq ıgi shara barysynda basylymnyń Almaty oblysyndaǵy menshikti tilshisi Qalmahanbet Muqametqalı baıqaýdy uıymdastyrǵan oblys ákimdigine, Tilderdi damytý basqarmasyna jáne qalyń oqyrmanǵa «Egemen Qazaqstan» gazetiniń basqarma tóraǵasy Darhan Qydyráliniń atynan alǵys aıtty.
