Keshe, ıaǵnı 3 mamyr kúni Qazaqstan Respýblıkasynyń Ortalyq saılaý komıssııasy Qasym-Jomart Kemeluly Toqaevty Qazaqstan Respýblıkasynyń Prezıdenttigine kandıdat retinde resmı túrde tirkep, kandıdat kýáligin onyń senimdi ókili, «Nur Otan» partııasy Tóraǵasynyń Birinshi orynbasary Máýlen Áshimbaevqa tapsyrdy. Osy sheshimnen keıin kandıdattyń respýblıkalyq qoǵamdyq shtaby qurylyp, ol zańǵa sáıkes 11 mamyr kúni saǵat 18:00-den bastap jumys isteıtini belgili boldy.
Búgingi brıfıngte Máýlen Áshimbaev Ortalyq saılaý komıssııasynyń sheshiminen keıin Qazaqstan Prezıdentiniń kezekten tys saılaýyna «Nur Otan» partııasynan kandıdat Qasym-Jomart Kemeluly Toqaevtyń Respýblıkalyq qoǵamdyq shtaby qurylǵanyn aıtty.
– Ortalyq saılaý komıssııasynyń sheshiminen keıin Qazaqstan Respýblıkasynyń Prezıdenttigine kandıdat Qasym-Jomart Kemeluly Toqaevtyń Respýblıkalyq qoǵamdyq shtaby quryldy. Shtab zańmen bekitilgen ýaqyttan bastap jumys isteıdi. Respýblıkalyq qoǵamdyq shtabtyń quramyna 187 adam endi. Olar elimizge belgili memleket jáne qoǵam qaıratkerleri, sondaı-aq belgili bir salada bıik belesterdi baǵyndyrǵan belsendi azamattar. Qasym-Jomart Kemeluly Respýblıkalyq qoǵamdyq shtabty basqarýdy maǵan tapsyrdy, – dedi Máýlen Áshimbaev.
Respýblıkalyq qoǵamdyq shtabtyń quramyna: Halyq Qaharmandary: Muhtar Altynbaev, Baqytjan Ertaev, Qazaqstannyń Eńbek Erleri: Ivan Saýer, Aıman Musahodjaeva, Serik Aqsholaqov, Iýrıı Pıa, Memleket jáne qoǵam qaıratkerleri: Kenjeǵalı Saǵadıev, Ádil Ahmetov, Sansyzbaı Esilov, Baqytjan Jumaǵulov, halyqaralyq sporttyq saıystarda elimizdiń atyn shyǵaryp, abyroıymyzdy asqaqtatqan sportshylarymyz: Jaqsylyq Úshkempirov, Aleksandr Vınokýrov, Aıbek Nuǵymarov, Zúlfııa Ǵabıdýllına, Álııa Júsipova, Qanat Islam jáne Dınara Sádýaqasova, úkimettik emes uıymdardyń ókilderi Arýjan Saın, Dınara Sháıjúnisova, Dıanara Zákıeva, belgili óner qaıratkerleri: Roza Rymbaeva, Dosxan Joljaqsynov, Altynaı Jorabaeva, Maıra Muxamedqyzy, Meırambek Besbaev, Samal Eslıamova, Sáken Maıǵazıev, Qydyráli Bolmanov, Tamara Asar syndy ánshiler men ártister, al jýrnalısterdiń arasynan Darxan Qydyráli, Nurtóre Júsip, Dana Nurjigit, Maııa Bekbaeva, Qalqaman Sarın sııaqty qalamgerler múshe boldy. Sondaı-aq Respýblıkalyq shtabtyń quramynda Parlament depýtattary da bar.
Sonymen qatar Respýblıkalyq qoǵamdyq shtabtyń basshysy alǵash ret qoǵamdyq shtabtyń «TeamQazaqstan» jastar qanaty da qurylǵanyn aıtty.
– Alǵash ret Respýblıkalyq qoǵamdyq shtabtyń jastar qanaty quryldy. Oǵan Qaırat Nurtas, Quralaı Anarbekova, Anna Alıabeva, Áıgerim Esenáli jáne taǵy basqa belgili belsendi jastar múshe boldy. Jastar qanaty negizinen elimizdegi jas býynmen jumys isteıdi, – dedi Máýlen Áshimbaev.
Osy rette Respýblıkalyq qoǵamdyq shtabtyń quramyndaǵy 187 adamnyń 33-i atalǵan jastar qanatynyń ókilderi ekenin aıta ketken jón.
Sonymen qatar jıynda búginde elimiz boıynsha 227 qoǵamdyq shtab qurylǵany aıtyldy. Onyń 17-si – oblystyq, 37-si – qalalyq jáne 173-i aýdandyq deńgeıde jumys isteıdi. Aımaqtyq jáne aýmaqtyq shtabtardyń quramyna 5766 adam ense, onyń 1267-si jastar qanatynyń ókilderi.
Máýlen Áshimbaev atalǵan shtabtar músheleriniń bári «Nur Otan» partııasynan Qazaqstan Prezıdenttigine kandıdattyń senimdi ókilderi ekenin erekshe atap ótti.
– Elimiz boıynsha Qasym-Jomart Kemelulynyń 19 500-den astam senimdi ókili tirkeldi. Olar belgili, belsendi azamattar, aýylsharýashylyq mamandary, ustazdar, zııalylar, sportshylar, qurylysshylar, mádenıet qaıratkerleri jáne basqa da mańyzdy salalardyń ókilderi, – dedi Respýblıkalyq qoǵamdyq shtabtyń basshysy.
Sondaı-aq Máýlen áshimbaev óz sózinde barlyq shtabta kandıdattyń qoǵamdyq qabyldaý bólmesi jumys isteıtinin, onda azamattardyń ótinishteri men usynystary qabyldanatynyn jetkizdi. Odan bólek, ol Respýblıkalyq qoǵamdyq shtabtyń músheleri 13 mamyrdan bastap barlyq óńirlerge shyǵyp, halyqpen kezdesetinine nazar aýdardy.
– Halyqpen kezdesýlerde kandıdatymyzdyń saılaýaldy baǵdarlamasy men azamattardy alańdatqan ózekti máseleler talqylanady. Shtabtyń jumysy men onyń músheleri týraly aqparattardy Respýblıkalyq qoǵamdyq shtabtyń resmı saıty men áleýmettik jelilerdegi paraqshalarynan da alýǵa bolady. Atalǵan saıt pen resmı akkaýnttar da zańǵa sáıkes 11 mamyrdan bastap jumys isteıdi, – dedi Máýlen Áshimbaev.
Sonymen qatar «Nur Otan» partııasy Tóraǵasynyń Birinshi orynbasary partııa Tóraǵasynyń tapsyrmasyna sáıkes saılaýaldyń úgit-nasıhat jumystaryn joǵary deńgeıde, kreatıvti, tıimdi, zamanaýı tehnologııalardy qoldanyp nátıjeli ótkizýge daıyn ekenin jetkizdi.
– Tuńǵysh Prezıdent – Elbasy, partııamyzdyń Tóraǵasy Nursultan Ábishuly Nazarbaev pen Memleket basshysy Qasym-Jomart Kemeluly Toqaevtyń tapsyrmasy boıynsha bul saılaý ádil ári ashyq, Qazaqstan Respýblıkasynyń zańdaryna sáıkes, halyqaralyq normalarǵa saı, joǵary deńgeıde ótýi kerek. Partııamyz saılaýdyń ashyq ári ádil ótýi úshin barlyq sharalardy júzege asyrady. Ol úshin biz Ortalyq saılaý komıssııasymen, otandyq jáne halyqaralyq baqylaýshylarmen, sondaı-aq, buqaralyq aqparat quraldarymen tyǵyz jumys isteýge daıynbyz, – dedi Máýlen Áshimbaev.
Sóz sońynda ol elimizdiń iri saıası naýqannyń aldynda turǵanyn aıtyp, bul barsha qazaqstandyqtar úshin jaýapkershilik ekenin tilge tıek etti.
– Bul saılaý bıliktiń sabaqtastyǵyn qamtamasyz etýge, elimizdegi saıası júıeni kúsheıtýge, halqymyzdyń tatýlyǵy men turaqtylyǵyn nyǵaıtýǵa úles qosatyn qadam dep qabyldaımyz. Sondyqtan bul saılaýdyń Qazaqstandy damýdyń jańa kezeńine alyp shyǵatyn shara bolaryna senemiz jáne bizdiń partııamyz sol jolda aıanbaı eńbek etedi, – dedi Máýlen Áshimbaev.
Is-shara barysynda Respýblıkalyq qoǵamdyq shtabtyń músheleri: belgili qoǵam qaıratkeri, «Ulttyq ǵylymı medısınalyq ortalyq» AQ Basqarma Tóraǵasy Abaı Baıgenjın, «Atameken» UKP Basqarma Tóraǵasy, «Nur Otan» partııasy Saıası keńesiniń múshesi Abylaı Myrzahmetov, qoǵam qaıratkeri, qaıyrymdylyq qorynyń dırektory Arýjan Saın jáne «Qazaqstan» ulttyq telearnasynyń júrgizýshisi, bloger Áıgerim Esenáli sóz sóılep, aldaǵy saıası naýqanǵa tas-túıin daıyn ekenderin jetkizdi.
