Máskeýlik talǵampaz kórermen konsert boıy mýzykanttardy qoshemetke bóledi. Al, kelesi konsert 5 mamyr kúni Sankt-Peterbordaǵy Mıhaılov teatrynda ótedi.
Biregeı Gelıkon zalyna jınalǵan 500-den asa tyńdarman shyǵarmashylyq ujymnyń naǵyz jankúıeri deýge bolady. Olar árbir shyǵarmany erekshe yqylaspen qabyldap, kóptiń súıiktisine aınalǵan «Dýdar-aı» ánin daýystap birge oryndap, halyqtyq shyǵarmaǵa aınalǵan «Saryarqa», «Adaı», «Túrkesh» kúılerin sońǵy notasyna deıin tebirene tyńdady.
Konsertte Qurmanǵazy kúılerinen bastap, qazaq,orys jáne shetel kompozıtorlarynyń shyǵarmalary: E.Brýsılovskıı, L.Bernstaın týyndylary men qazaq–orys halyq ánderi shyrqaldy. Barlyǵy 21 shyǵarma oryndaldy. Orkestrmen birge qazaq óner maıtalmandary óner kórsetti. Eńbek sińirgen qaıratker, orkestr dırektory Nurǵısa Dáýeshov Máskeýde ujym jankúıerleriniń kóptigine senimdi.
«Bul jerde bizdi asyǵa kútetinderdiń bar ekenin men jaqsy bilemin. О́ıtkeni, ótken jyly biz Parıjde, IýNESKO-nyń shtab-páterinde konsert qoıǵanda bizdi tyńdaý úshin Fransııaǵa arnaıy ushyp kelgen reseıliktermen kezdestik. Jalpy, bizdiń ujym bıyl 100 konsert berýdi josparlap otyr. Bul úshin barynsha jumys istep jatyrmyz. Sebebi jaǵdaı bar, múmkindik mol. Bizge jaqynda jeke konsert zaly berildi. Bul orkestr tarıhyndaǵy ekinshi ǵımarat. Máskeýden Peterborǵa, odan keıin Pekınde konsert qoıamyz. Aıtpaqshy, Qurmanǵazy orkestri buǵan deıin Máskeýde 16, Peterborda 30 jyl buryn konsert beripti. Tyńdarmanǵa merekelik kóńil-kúı syılaımyz degen úmittemiz», dedi ol.
Máskeýde ótken mereıtoılyq konsert qazaqtyń eń tańdaýly, tereń oı-tolǵamdy - «Kóńilashar», «Kósh kerýen» kúılerimen bastaldy. Budan ári konsert Qaırat Kákimov shyrqaǵan «Qyz Jibek» operasyndaǵy «Shegeniń termesimen» jalǵasyn tapty. Ásem án kórermendi qazaqtyń saıyn dalasyndaǵy kórinispen baýraǵandaı áserge bóledi. Kórkine aqyly saı sulý Qyz Jibek týraly, mahabbat mashaqaty jolynda týyndaǵan oqıǵa jaıly án kóptiń kóńilenen shyqqan eń úzdik týyndy boldy. Konsert «Edil men Jaıyq» ánimen aıaqtaldy. Sondaı-aq otbasylyq jup Mıras pen Quralaı Bekjanovtar oryndaǵan A.Muhamedıulynyń «Nur-Sultan» áni tyńdarmannyń kóńilinen shyqty.
«Máskeýde kún saıyn túrli konsertter ótedi. Al, Qurmanǵazy orkestriniń konsertine erekshe kóńilge kóńil kúımen bardym. Qazaqstan únemi erekshe baǵdarlamalarmen keledi. Búgin de dál solaı. Repertýar júıeli talǵammen tańdalǵan. Oryndaýshylar keremet daýysty», deıdi máskeýlik turǵyn Býrova Nadejda Vasılevna.
Mýzyka keshi Nurǵısa Tilendıev pen Qurmanǵazy kompozısııasymen aıaqtaldy. «Mahambet» jáne «Saryarqa» kúıleri qazaq mýzykasynyń tarıhynda altyn áriptermen jazylǵan, sazger jaýynger beınesin beınelep, táýelsizdik pen erkindikti sezdirtedi. Tyńdarmannyń ystyq yqylasy men zor qoshemeti mýzykantardy erekshe kúıge bóledi.
