Al kóp balaly analar Galına Oljabaeva men Ásel Mırmanova árqaısysy ákesiz 4 bala asyrap otyr. Ásel Mırmanovanyń bir balasy aýyrady, onyń ákesinen alıment te ala almaıdy. Galına baspanany jaldap turady, balalarynyń kıimine, tamaǵyna qarjy jetpeıtinin aıta kelgen. III toptaǵy múgedek Nurahmet Arystanov 10 jyldan beri turatyn baspanasyn jekeshelendirýge kómek suraıdy.
Qoǵamdyq qabyldaýǵa qatysqan partııanyń Qostanaı qalalyq fılıaly tóraǵasynyń orynbasary Manarbek Sultanǵazın, qalalyq máslıhattyń depýtaty Olga Igımbaeva, Qostanaı qalalyq jumyspen qamtý jáne áleýmettik baǵdarlamalar bóliminiń basshysy Aqbópe Manatova olardyń barlyǵyn da muqııat tyńdap, ótinishterin jazdyryp aldy. Úsh otbasyna azyq-túlik berildi. Turmys taýqymetin tartqan otbasylarynyń jaǵdaıy «Halyqqa kómek» jobasy aıasynda taldanyp, ekshelip, olarǵa zań aıasynda tıisti kómek kórsetiletin bolady.
Búginde Qostanaı qalasynda 730 kóp balaly jáne áleýmettik turmysy áljýaz otbasy bar. Olardyń arasynda 270 otbasy baspana kezeginde tur. Qostanaı qalalyq jumyspen qamtý jáne áleýmettik baǵdarlamalar bóliminiń basshysy Aqbópe Manatovanyń aıtýynsha, tabysy az otbasylaryna ataýly áleýmettik kómek kórsetiledi.
– Onyń syrtynda kásipkerler qoldaýymen qys aılarynda 28 otbasyna 64 tonna kómir túsirildi, 168 otbasyna azyq-túlik jaǵynan kómek berildi. 34 otbasynan 90 bala mektepterde tegin tamaqtandyrylady. Bir balany Nur-Sultan qalasyna emdeýge aparý úshin 90 myń teńge kómek jasaldy, 1 stýdenttiń oqý aqysy tólendi. 8 bala asyrap otyrǵan kóp balaly otbasyna kásipker 3 bólmeli páter alyp berdi, – deıdi Aqbópe Rahymjanqyzy.
