Munda jarty myńǵa jýyq tropıkalyq, sýbtropıkalyq ósimdikter jaıqala ósip tur. Solardyń biri – anar aǵashy. Onyń gúldený sátin oranjereıa qyzmetkerleri 10 jyl boıy kútipti.
«Anar sýbtropıkalyq jemis bolǵandyqtan, negizinen Orta Azııada ósedi. Biz teriskeıde jersindirýge táýekel etip, alty túbin Germanııadan aldyrǵanbyz. Jaqsy kútimniń arqasynda kóshettiń 2-ýi ósip, ónip, bıyl birinshi ret búrshik jardy. Olardy baq qyzmetkerleri jasandy jolmen tozańdandyrdy. Nátıjesi biz kútkennen de asyp tústi», deıdi botanıkalyq baqtyń bas agronomy Ravıl Rıazapov.
Bıyl analyq gúlderdiń birnesheýi sátti tozańdanyp, túınekteı jemis sala bastapty. Mundaǵylar jaz maýsymynyń aıaǵyna qaraı qaraı qyzara bórtip, balbyraı pisýin asyǵa tosyp júr.
Baqta kýbalyq lımon da ósedi. Otanynda ony «panderoza» deıdi. Byltyr túsim jaman bolmapty. Qazaqstan-Reseı óńiraralyq forýmyna qatysqan Tatarstan prezıdentine bir lımon syıǵa tartylypty. Bıyl da jemisti mol salatyn túri bar. Al kýbanyń panderozasyna qaraǵanda pákistandyq jemistiń bul túri kólemi jaǵynan kishileý, biraq ósimtal.Sýpermarket sórelerinde tolyp turǵan bul lımon botanıkalyq baqta 50-ge jýyq jemis beredi.
Qońyr kúzge taman ekologııalyq ortalyqta mandarın men banandar da balbyrap pisedi. Qazir jap-jasyl injir jemisi eki aıdyń ishinde ýyljyp shyǵa keledi.
