Oblys ákimi Ońdasyn Orazalın aldymen Aqtóbedegi 700 orynǵa arnalǵan, halyqaralyq talaptarǵa saı boı kótergen «Jekpe-jek» saraıynda boldy. «Jekpe-jek» sport saraıynda «Joǵarǵy sheberlik sport mektebi» ornalasqan. Onda 800-ge jýyq sportshynyń júıeli túrde sportpen shuǵyldanýyna múmkindik jasalǵan. Sporttyq saraıda, qazaq kúresi, erkin kúres, boks, grek-rım kúresi, taekvando, ústel tennısi syndy on bes sporttyń túrimen aınalysýǵa bolady.
О́ńir basshysy, sonymen qatar, Aqtóbe medısınalyq ortalyǵyna bardy. 2017 jyldan bastap oblystyq klınıkalyq aýrýhana, oblystyq balalar klınıkalyq aýrýhanasy jáne keńes berý-dıagnostıkalyq ortalyǵy biriktirilgen. Aýysymyna 500 kelýshige qyzmet kórsetedi.
Alaıda, halyq jıi bas suǵatyn medısınalyq ortalyqtyń tazalyǵy men jınaqylyǵy kóńil kónshitpeıdi. Oblys ákimi osy kemshilikterge qatysty syn-eskertpe jasady. Ǵımarat aldynda aram shópter ósip, kópshilikten qalǵan qoqystardan tazartylmaǵan. Aımaq basshysy qulaǵan erneýler men ǵımaratqa kire beris qaqpanyń durys qoıylmaǵanyn da aıtyp ótti. Medısınalyq ortalyq basshylyǵyna kemshilikterdi tez arada retke keltirýdi tapsyrdy.
Sonymen qatar, oblys ákimin qala tazalyǵy men kelbetine qatysty máseleler beıjaı qaldyrmady. Abaı kóshesindegi turǵyndar demalatyn oryndardy jaıaý aralaǵan oblys ákimi kógaldandyrý, aǵashtardy aqtaý, abattandyrý jumystarynyń atqarylýyn baqylady. Oblys basshysy qala ákimi Ilııas Ispanovqa jol jıegindegi qulaǵan erneýlerdi qalypqa keltirý, tazalyq máselesin basty nazarda ustaý qajettigin nyqtap tapsyrdy.
