- Bul ortalyq Qyzylorda oblystyq halyq depýtattary Keńesi atqarýshy komıtetiniń 1990 jylǵy 19 qyrkúıektegi «Qyzylorda qalasynda balalarǵa arnalǵan psıhonevrologııalyq ınternat úıin ashý» týraly sheshimen qurylǵan. Halyqty áleýmettik qorǵaý salasynda stasıonarlyq jáne jartylaı stasıonarlyq 7 baǵyt boıynsha arnaýly áleýmettik kómekter kórsetedi. Jalpy orny 150 adamǵa shaqtalǵan. 100-i stasıonarlyq, al 50-i jartylaı stasıonarlyq qyzmetke arnalǵan. Naqty kezeńde 100 balǵyn kómek alyp jatyr, - dedi halyq qalaýlylaryna mekeme basshysy Aıgúl Shamshatova.
Múmkindigi shekteýli múgedek balalarǵa medısınalyq, áleýmettik jaǵdaı jasaýda ǵımarattyń qyzmet kórsetýge arnalǵan árbir bólmesi zamanaýı qural-jabdyqtarmen jabdyqtalǵan. Munda negizinen DSP, ROPSNS, epılepsııa, Daýna, gıdrosefalııa aýrýlary, sondaı-aq, aqyl-esiniń aýytqýshylyǵy bar naýqas balalar emdeledi. Qazir stasıonarda - 64, al jartylaı stasıonarda - 46 múmkindigi shekteýli balǵyndar tárbıelenip, em alyp jatyr eken.
Májilis depýtattary ortalyq qyzmetimen tanysqannan keıin sala qyzmetkerlerimen de júzdesti. Tuńǵysh Prezıdent - Elbasy Nursultan Nazarbaevtyń múmkindigi shekteýli azamattarǵa, sonyń ishinde balǵyndarǵa, az qamtylǵan jáne kóp balaly otbasylardy qoldaýǵa baǵyttalǵan áleýmettik bastamalaryn júzege asyrý jónindegi máselelerdi jan-jaqty sóz etti.
- Biz birneshe kúnnen beri oblystaǵy birqatar aýmaqta bolyp, shalǵaı eldi mekenderdiń de jaǵdaıymen tanystyq. Ol jerlerde de túrli áleýmettik nysandar paıdalanýǵa berilgendigin kózimizben kórdik. Balalar ortalyǵy, bul - múmkindigi shekteýli balǵyndarymyz úshin óte qajet dúnıe. Munda barlyq jaǵdaı jasalǵan eken. Al oblys boıynsha jergilikti turǵyndarmen kezdesý barysynda baıqaǵanymyz, arnaýly áleýmettik kómektiń eseptelýindegi máseleler jıi sóz boldy. Biz bul máseleler boıynsha jumys isteıtin bolamyz, - dedi Májilis depýtaty Nurjan Áltaev.
Halyq qalaýlylary oblystaǵy kezdesýler barysyndaǵy jınaqtalǵan máselelerdi Úkimet nazaryna usynatyndyqtaryn aıtty.
