- Elbasy Nursultan Nazarbaev óz Joldaýynda «Pedagog mártebesi týraly» zańnyń jobasyn qabyldaýdy usynyp, ustazdar qaýymyna erekshe nazar aýdarǵan bolatyn. Osy oraıda jetisýlyq jas jetkinshekterdiń ustaz mártebesine degen qurmetin arttyrý úshin arnaıy baıqaý jarııalaýdy oıladyq. Shyǵarma jazýshylar qatary kóp bolǵany bizdi qýantty. Bul jastar arasyndaǵy muǵalim bedeliniń joǵary ekenin, áli de ustaz mamandyǵyna degen qyzyǵýshylyqtyń joǵalmaǵanyn kórsetti, - deıdi Almaty oblystyq bilim jáne ǵylym qyzmetkerleri kásipodaq uıymynyń basshysy Sadyq Nursapauly.
«Ustaz bolǵym keledi» shyǵarmalar baıqaýy eki kezeńnen turdy. Alǵashqyda mektepshilik jáne aýdandyq, qalalyq deńgeıinde irikteýi ótip, oǵan qatysqan 89 úmitkerdiń arasynan jıyrma bir oqýshy oblystyq kezeńge joldama aldy. Nátıjesinde, júzden júırik shyǵyp, bas júldeni Alakól aýdany, Jylandy orta mektebiniń 11- synyp oqýshysy Ulan Bazarbaev, I oryndy Panfılov aýdany, Áýlıeaǵash orta mektebiniń 11-synyp oqýshysy Alýa Asqar, II oryndy Eskeldi aýdany, Baqtybaı Jolbarysuly atyndaǵy orta mekteptiń 11 synyp oqýshysy Araılym Tazabekova, III oryndy Tekeli qalasy, №4 orta mekteptiń 11-synyp oqýshysy Ekaterına Sýgakova ıelendi. Jeńimpazdarǵa dıplomdar, aqshalaı syılyqtar jáne Almaty oblystyq bilim jáne ǵylym qyzmetkerleri kásipodaq uıymy men I.Jansúgirov atyndaǵy Jetisý memlekettik ýnıversıteti kásipodaq fılıalynyń shákirtaqy taǵaıyndaý týraly sertıfıkaty tapsyryldy.
