Qasıetti Ramazan aıynyń ekinshi kúninde, Otan qorǵaýshylar kúni merekesinde Semeı men О́skemendegi (ár qalada besten) 10 kóp balaly otbasyǵa páter kiltteri tapsyryldy. О́skemendegi rásimge qatysqan oblys ákimi Danıal Ahmetov bul baspanalar Elbasy tapsyrmasyna saı berilip jatqanyn atap ótip, óńirde jyl aıaǵyna deıin 200-den astam kóp balaly otbasy úımen qamtamasyz etiletinin jetkizdi.
Búgin aımaq basshysynyń qolynan eki bólmeli qyzmettik páterdiń kiltin alǵan 7 balanyń anasy, «Altyn alqa» ıegeri Gúljan Ábdirahmanova Sogra yqsham aýdanyndaǵy saıajaıda 10 jyldan beri turyp keledi eken. Jubaıy veterınarlyq zerthanada jumys istese, ózi Jumyspen qamtý ortalyǵy arqyly qoǵamdyq qyzmetker bolyp eńbek etedi eken. «Baspana kezegine 2012 jyly turǵanbyz. 10 jyl boıy aýmaǵy 12 sharshy metr bir bólmeli páterdi pana qyldyq. Balalarymyzdyń aldy - 17-de, eń kenjesi - 3-te. Joldasym 100 myń alady, qolǵa 84 myńy tıedi, meniki - 45 myń. Balalarǵa tıesili ataýly áleýmettik kómekti keshe aldyq. 151 myń teńge qolymyzǵa tıdi. Buryn 48 myń bolatyn», - deıdi kóp balaly ana.
«Sizge basqa qandaı jeńildikter bar?» degen suraǵymyzǵa: «Qala ishindegi marshrýtkalarda tegin júremiz. Avtobýstarda mundaı jeńildik qarastyrylmaǵan. Bir jyldary basseınge barýǵa jeńildikter bolatyn. Qazir toqtap qaldy. Kómir alýǵa azdaǵan jeńildik qarastyrylǵan. Baǵasyn 500 teńgege túsirip beredi», - deıdi Gúlzat.
Shahardaǵy 22 mektepte muǵalim bolyp jumys isteıtin, tórt bala tárbıelep otyrǵan jalǵyz basty ana Sáýle Almatova Menevnoe aýylynda turatynyn aıtty. 2002 jyly alǵan 3 bólmeli úıi 2011 jyly qysta órtenip, jazǵy ashanada turýǵa májbúr bolypty. «Úı qulaıyn dep tur. Úıdi komıssııa eki ret tekserdi. Ataýly áleýmettik kómekti alýǵa áli barǵan joqpyn. Merekeden keıin baramyz. Bizge berilip jatqan úıdi memlekettik qyzmette 10 jyldan astam ýaqyt jumys istegen adamǵa keıin jekeshelendirýge bolady dep jatyr. Jańa úı eń bastysy jyly bolsa bolǵany. Buǵan deıin úıimizge kúni boıy pesh jaǵatynbyz. Bir qysqa 10 tonna kómir ketetin. Menevnoıdaǵy úıimizde baý-baqsha egemiz. Uldar jazda jumys isteıdi. Sosyn «mynaý kıimge, mynaý otynǵa» dep josparlaımyz» deıdi kóp balaly ana.
О́SKEMEN
Sýretti túsirgen Tileýbek ShAIаHMET
