«Rýhanı jańǵyrý» baǵdarlamasy aıasynda qolǵa alynyp, keń-baıtaq qazaq jeriniń ádebı murasyn zerttep, jaryqqa shyǵarýdy ditteıtin jańa jobanyń maqsaty jaıly qalamgerler О́mirzaq Muqaı men Arman Álmenbet jan-jaqty baıandap berdi.
«Adamzat balasynyń taqymy alǵash atqa tıgen Aıyrtaý aýdanyn araladyq. Tunyp turǵan tarıh eken! Shoqannyń qııalyna qanat bitirgen bir Syrymbettiń ózinen kóptegen maǵlumattar aldyq. Aýzy dýaly aqsaqaldarmen, jalyndy jastarmen áńgimelestik. «Ádebı ólketaný» jobasy aıasynda jaryq kóretin basylymǵa osyndaı súıekti taqyryptar qamtylady», dedi «Parasat» jýrnalynyń bas redaktory, jazýshy О́mirzaq Muqaı.
Jańa býyn qalamgerleriniń ókili Arman Álmánbet eldiń shetinde, jeldiń ótinde turǵan, qazaǵynan qonaǵy basym óńirde til, dil máselelerine qatysty oı qozǵady. Jazýshylar odaǵynyń jańa jobasy týraly estip, teriskeıge ádeıi suranypty. Maǵjan, Sábıt, Ǵabıttiń izi qalǵan súrleýmen júrip, kóp nársege qanyǵypty. Sapar barysynda Maǵjannyń týǵan aýylyna baryp, murajaıyndaǵy qundy jádigerlermen tanysypty. Ol shyǵarmashylyqqa arqaý bolar derekterdiń jetkilikti ekenin aıtty.
Kezdesýge qatysqan «Pamıat» qoǵamdyq qorynyń tóraǵasy Bolat Saǵyndyqov, ardagerler keńesi tóraǵasynyń orynbasary Jangeldi Tájın, ólketanýshy Ahmetjan Qýantaev Qyzyljar óńiriniń qasıeti týraly oı tolǵap, qalamgerlerge ózderin mazalaǵan saýaldaryn joldady.
Soltústik Qazaqstan oblysy
