Shtab jumysyn partııa fılıaly tóraǵasynyń birinshi orynbasary B.Narymbetov basqaratyn boldy. Osyǵan oraı, tarıhı saılaý naýqanynyń jumysyn óńirlerde belsendi uıymdastyrý maqsatynda partııa fılıaly tóraǵasynyń birinshi orynbasary Bahadyr Narymbetov arnaıy brıfıng ótkizdi.
Jıynda Bahadyr Mádáliuly jańa qurylǵan qoǵamdyq shtabtyń negizgi mindetine toqtalyp, Qazaqstan Respýblıkasy Prezıdenttigine kandıdat Qasym-Jomart Toqaevty saılaý naýqany kezinde qoldap, onyń saılaý aldyndaǵy baǵdarlamasyn túsindirý boıynsha nasıhat jumystaryn júrgizýdi tapsyrdy.
«Partııa aldaǵy saılaýǵa daıyndyq jumystaryn aıaqtady. Úgit-nasıhat jumystaryn zań talaptaryna saı, barlyq kúsh-jigerimizdi sala atqaramyz dep oılaımyn. Úgit-nasıhat jumystary 11 mamyr kúni keshki saǵat 18:00-den keıin bastalyp, 7 maýsymda aıaqtalady. Bul aralyqta 475 is-shara uıymdastyrý josparlanyp otyr», dedi qalalyq qoǵamdyq shtab jetekshisi.
Shtab quramyna qaladaǵy memlekettik mekeme, qoǵamdyq uıym, etnomádenı ortalyqtardyń ókilderinen quralǵan 86 adam múshe boldy. Sonymen qatar 43 mobıldi úgit toby qurylyp, ondaǵy belsendiler 11 mamyrdyń keshinen bastap jańa kandıdattyń saıası naýqan aldyndaǵy baǵdarlamalaryn násıhattaýǵa baǵyttalǵan is-sharalarǵa belsendi qatyspaq.
Ári, shtab quramynda úgit-nasıhat naýqany kezinde ótkiziletin barlyq is-sharalardy aqparattyq qamtamasyz etetin arnaıy baspasóz qyzmeti de jumys isteıdi.
Budan bólek shtab qurylymynda Qoǵamdyq qabyldaý bólmesi jumys istep, onda kandıdattyń senimdi ókilderi azamattardy jeke máseleleri boıynsha qabyldap, túsken usynystar men tilekterdiń saraptamasy negizinde qoǵamdyq pikirdiń monıtorıngin júrgizedi.
ShYMKENT
