Jeńisti Chehoslovakııada qarsy alady, Keńes áskerinde qyzmet etip, elge 1950-shi jyly oralady. Soǵysta júrgende 62 ret parashıýtpen sekiredi. Elge oralǵan soń Qasymhan aǵa aldymen mektepte ustazdyq etedi, odan keıingi jyldary ómirin tutas jýrnalıstıkaǵa arnaıdy. Sonymen qatar, Qasymhan aǵaıdy qostanaılyqtar aıtys aqyny retinde de jaqsy biledi. Ol sonaý 50-shi jyldardan bastap osy bekzat ónerdiń Qostanaı óńirinde damýyna úles qosty. Respýblıkalyq aıtystarǵa da qatysty.
Qazir qarttyǵyna qaramastan Qasymhan aǵaı tyń, densaýlyǵynyń arqasynda balalarynyń, nemere-shóbereleriniń arasynda júrip jatyr. Ol jyl saıyn merekede Jeńis saıabaǵyna kelip, osy kúnge, elimizdiń Táýelsizdigine jete almaǵan maıdandastarynyń, bozdaqtardyń rýhyna arnap, gúl shoǵyn qoıady. Saıabaqtyń ishindegi kógalda otyryp, soldat botqasynan dámaýyz tatyp, ótken kúnderdi eske alady, balalaryna áńgimeleıdi.
Bıyl Qasymhan aǵa Qostanaı qalasynyń ákimi Qaırat Ahmetovpen birge taǵy da Máńgilik ot basyna gúl sebetin qoıyp,erlikke taǵzym etti.
«Bul asa qasıetti kún. Alapat soǵys qansha adamnyń ómirin jutty, qansha bala jetim qaldy, ana jesir qaldy. Sondaı aýyr kúnderdi bastan keshtik. Jeńis bolmaǵanda eldiń kúni ne bolar edi dep oılaımyn qazir. Mine, búgin mamyrajaı zaman, bári de bar. Beıbit elde bárine de shúkirshilik aıtý kerek» deıdi qart maıdanger.
Jasy júzdi shamalap qalǵan Qasymhan aǵa Jeńis merekesi kúni saıabaqtaǵy Máńgilik ot basyna kelgen saýsaqpen sanarlyq ardagerdiń biri boldy. Búginde Qostanaı qalasynda 50 soǵys ardageri ǵana turady, oblys óńirinde 113 maıdanger qaldy. Olardyń basym kópshiligi jasy kelgendikten, aýrýdan úıden shyǵa almaı, otyryp qalǵan qarııalar. Olarǵa jergilikti atqarý organdary tarapynan qurmet kórsetildi.
