Uly Otan Soǵysynyń otty jyldary el qorǵaýǵa attanǵan jaýyngerler óshpes erliktiń, qaıtpas qaısarlyqtyń, naǵyz qaharmandyqtyń úlgisin kórsete bildi. Jeńis ońaılyqpen kelgen joq. Qanshama jaýyngerler maıdan dalasynda Otan úshin opat boldy.
Tarıh betterinde sýyq atpen tańbalanǵan soǵys ardagerlerin ardaqtap, olardyń erlikterin dáripteý maqsatyndaǵy saltanatty is-sharada aýdan ákimi bastaǵan aýdan turǵyndary máńgilik alaýǵa gúl shoqtaryn qoıyp, ómirden ótken maıdangerlerdi bir mınýttyq únsizdikpen eske alysty.
Aýdan ónerpazdary tarapynan soǵys jyldarynyń qaıǵy-qasireti men batyrlarymyzdyń eren eńbekteri jaıly sahnalastyrylǵan kórinister qoıylyp, patrıottyq ánder shyrqaldy. Sonymen qatar, merekelik sharada áskerı shatyr tigilip, qonaqtarǵa áskerı dám usynyldy. Ardagerlerge syı-qurmet kórsetildi.
«Bul mereke janqııar erliktiń, eńseli eldiktiń rýhy órlep, jeńis jalaýy jelbiregen kún. Bir týdyń astyna birikken kóptegen ult pen ulys ókilderin quraǵan Keńes Odaǵynyń halqy qaharmandyq erlik kórsetip Otanymyzdy jaýdan qorǵap qaldy. Aǵa urpaqtyń Uly Otan Soǵysynyń ot jalyndy jyldaryndaǵy erlikteri, soǵystan keıin halyq sharýashylyǵyn qalpyna keltirý jolynda qajyrly eńbekteri biz úshin óshpes ónege, sarqylmas mura bolyp qala beredi. Biz arqyly keler urpaqtyń jadyna sińiriletin bolady» degen aýdan ákimi Baqyt Asanov jurtshylyqty aıtýly merekemen quttyqtady.
Saltanatty merekelik sharadan soń aýdan basshysy bastaǵan zııaly qaýym ókilderi Keńes Odaǵynyń Batyry Joldybaı Nurlybaevtyń Myrzakent kentindegi eskertkishine gúl shoqtaryn qoıyp, taǵzym etti.
Ýaqyt ótken saıyn keshegi kúndeı kúrkirep ótken surapyl soǵystyń dúrbeleń oqıǵalary da arasyn aýlaq salyp, alystap barady. Biraq, qanshalyqty alystaǵanymen eshqashan da kóńilderden ketip, júrekterden óshpek emes.
