Qazaqstan men AQSh arasyndaǵy keńeıtilgen strategııalyq áriptestikti nyǵaıtý aıasynda jasalǵan kelisim eki memlekettiń konsýldyq mekemeleri, konsýldyq laýazymdy tulǵalary jáne olardyń otbasy músheleri paıdalanatyn ózara ımmýnıtetter men artyqshylyqtardy kúsheıtip, qyzmet sharttaryna oń áserin tıgizedi.
Syrtqy ister mınıstriniń orynbasary Erjan Ashyqbaev byltyr qańtarda Tuńǵysh Prezıdent Nursultan Nazarbaev AQSh-qa resmı saparynda ekijaqty qarym-qatynasty keńeıtilgen strategııalyq áriptestik deńgeıine shyǵarý týraly ýaǵdalastyqqa qol jetkizip, sonyń aıasynda atalǵan kelisim jasalǵanyn málimdedi. Kelisimdi iske asyrý qos el azamattarynyń múddelerin alǵa jyljytý jáne qorǵaý tıimdiligin arttyrady.
Bul – Ýılıam Mozerdiń AQSh-tyń Qazaqstandaǵy elshisi retinde qol qoıǵan alǵashqy qujaty. Ol jasalǵan kelisim eki el úshin mańyzdy saıası tapsyrma ekenin, bul týrızmdi túletý, ekonomıkany damytý, ınvestısııa tartý salasynda baılanysty nyǵaıtýǵa septigin tıgizetinin jetkizdi. Sondaı-aq ekijaqty áriptestik AQSh-tyń óz ýaqytynda Qazaqstan táýelsizdigin moıyndaǵan kezinen bastalǵanyn atap ótip, 2006 jyly Nur-Sultan qalasynda ashylǵan elshilikke qosa, búginde Almatyda jańa elshilik ǵımaratyn salýdy josparlap jatqandaryn habarlady.
Búginde AQSh aýmaǵynda Qazaqstannyń eki bas konsýldyǵy jumys isteıdi. Onyń biri Nıý-Iork qalasynda bolsa, ekinshisi bıyl qańtar aıynda San-Fransısko qalasynda ashyldy.
