Dombyrashylar Amangeldi aýdanyndaǵy mektep oqýshylarynan, aýyl jastarynan, ustazdardan quraldy. Bes-on emes, 500 dombyranyń qulaq kúıin keltirip, talaptylardy dırıjer taıaqshasyna baǵynýǵa úıretý ońaı sharýa emes. Osy mindetti Amangeldi aýdanynyń perzenti, Mádenıet salasynyń úzdigi Saparǵalı Ahmetjanov moınyna alypty. Mádenıet salasynda halyq shaǵarmashylyǵy boıynsha jarty ǵasyrǵa jýyq eńbek etip kele jatqan 73 jastaǵy ónerpaz sahna jaýapkershiligine adaldyq tanytyp, osynda ózi turatyn Nur-Sultan qalasynan arnaıy tórt-bes ret kelipti.
– Men «Amangeldi aýdanynyń qurmetti azamaty» ǵana emespin, týǵan jerimniń patrıotymyn. Aýyl balalarynyń barlyǵy da dombyrany erkin tartady. Olar oınaǵan kúıdiń áseri dýyldatyp, jurttyń rýhyn kóterip jibergen joq pa, – deıdi Saparǵalı aǵa ushatyn qyrandaı qomdanyp.
Bir qyzyǵy, appaq shaǵaladaı bolyp kıinip, dombyrasyn baptap ustap otyrǵan kúıshilerdi festıvalǵa syrttan kelgen týrıster arasynan «rasynda, sany 500 be?» dep, syrttaı sanap ta shyqqandar boldy. Al Amangeldi aýdanynyń ákimi Ámirhan Asanov endi sahnaǵa myń dombyrashy shyǵarýdy oılastyryp ta qoıypty. Saparǵalı aǵa ákim bastamasyn qup alyp, bilek sybanyp otyr.
– Shilde aıynda «Dombyra kúni» qurmetine sahnaǵa myń kúıshi shyǵatyn bolady. Olardyń barlyǵyn da aýyldardan jınaımyz. Aýylda dombyra shertpeıtin qazaq joq, olarǵa on shaqty kúı úıretip, sahnaǵa daıyndaý óz qolymda! – deıdi Saparǵalı Ahmetjanov.
Myń amangeldilik bir sátte sahnaǵa shyqqanda búkil qazaq dalasyna dombyra shanaǵynan kúı shashylǵandaı bolar, bálkim.
Qostanaı oblysy,
Amangeldi aýdany
