Jyl saıyn kóp balaly otbasylar úshin jalǵa beriletin turǵyn úı salýǵa jáne satyp alýǵa óńirlerge 50 mlrd teńgeden bólý kózdelgen. Sóıtip ár jylda 6 myń kóp balaly otbasy baspanamen qamtamasyz etilmek. Jospar boıynsha 2025 jylǵa deıin 40 myń kóp balaly otbasy jaldamaly turǵyn úımen qamtylady.
– Bıylǵy 1 mamyrda 249 baspana berildi. Mamyrdyń 7-si kúni Semeı jáne О́skemen qalalarynda kóp balaly otbasylarǵa 10 páter berildi. Bıylǵy mamyr aıynyń sońyna deıin barlyq qarjy kózderi esebinen 1200-1300 kóp balaly otbasyn turǵyn úımen qamtamasyz etý josparlanýda. Bizde baspana berýdiń arnaıy kestesi bar. Máselen, 9 mamyrda Batys Qazaqstan oblysynyń, Shymkent qalasynyń kóp balaly otbasylaryna páter kilti tabystaldy. 25 mamyrda Atyraý oblysy men Almaty qalasynda beriledi, – dedi Q.О́skenbaev.
Buǵan qosymsha bıylǵy maýsym aıynda «Turǵyn úı qurylys jınaq banki» AQ arqyly kóp balaly, tolyq emes otbasylardy, sondaı-aq múmkindigi shekteýli balalary bar otbasylardy jeńildikpen nesıelendirýdi bastaý josparlanǵan. Bul zaımdar jyldyq 2% mólsherleme boıynsha, 20 jylǵa deıingi merzimge, bastapqy jarnasy 10%-dan bastap beriledi. Bastapqy jarnanyń bir bóligi turǵyn úı sertıfıkatymen jabylýy múmkin. Atalǵan tetikti iske asyrýǵa úsh jyl ishinde 150 mlrd teńge bólý kózdelgen. Bul jyl saıyn 6 myń zaım berýdi qamtamasyz etedi, 25 jyldyń ishinde 56 myń zaım beriletin bolady.
Sondaı-aq Q.О́skenbaev «Altyn alqa», «Kúmis alqa», «Batyr ana» ataǵyn alǵan kóp balaly otbasylar men analar jeke sanatqa shyǵarylyp, olarǵa birinshi kezekte turǵyn úı alý quqyǵyn berý zańnamalyq túrde bekitilgenin aıtty.
– Kóp balaly otbasylarǵa turǵyn úı berý boıynsha júrgizilip jatqan jumystyń alǵashqy nátıjesi osyndaı. Biz bul jumysty turaqty baqylaýǵa aldyq. Elbasynyń kóp balaly otbasylardy turǵyn úımen qamtamasyz etý jónindegi tapsyrmasy tolyǵymen oryndalady. Búginde baspana alýǵa kezekte turǵan kóp balaly otbasylar 2025 jylǵa deıin memleketten turǵyn úımen qamtamasyz etiledi. Osy jyldyń ózinde 12 myń otbasy ózderiniń páterlerine ornalasady (barlyq qarjy kózderi esebinen – 6 myń, Turǵyn úı qurylys jınaq banki arqyly jeńildikpen nesıelendirý esebinen – 6 myń). Osylaısha, 3-4 jyl ishinde turǵyn úıge muqtaj kóp balaly otbasylardyń máselesin tolyǵymen sheshemiz dep josparlap otyrmyz, – dedi Q.О́skenbaev.
«Qazaqstannyń turǵyn úı qurylys jınaq banki» AQ basqarma tóraıymy Lıazzat Ibragımovanyń aıtýynsha, baspana alýda kóp balaly otbasylardy qoldaýǵa baǵyttalǵan «Baqytty otbasy» atty jańa baǵdarlama iske qosylǵan.
– Bul joba Elbasynyń Nur Otan partııasynyń XVIII sezinde bergen tapsyrmasyna sáıkes, «Nurly jer» baǵdarlamasy aıasynda iske qosylyp otyr. Baǵdarlamaǵa 4 jáne odan da kóp balalary bar kóp balaly otbasylar, kámelettik jasqa tolmaǵan balalary bar tolyq emes otbasylar, múmkindigi shekteýli balalary bar otbasylar qatysa alady. Atalǵan nesıe aıasynda jańadan salynǵan nemese ekinshi naryqtaǵy daıyn úılerdi satyp alýǵa bolady, dedi L.Ibragımova. Aıta keterligi, atalǵan baǵdarlamaǵa bir adamǵa shaqqanda tabysy (jalaqysy) 42 500 teńgeden aspaıtyn otbasylar qatysa alady. Máselen, eger otbasy 6 adamnan tursa, onda olardyń jalpy tabysy 255 myń teńgeden aspaýy qajet. Qanatqaqty joba aıasynda ákimdikte kezekte turǵan kóp balaly otbasylar jańadan salynǵan úılerden páter satyp alýǵa jyldyq 2%-ben, bastapqy jarnasy 10%-dy quraıtyn nesıe ala alady. Búgingi tańda 344 ótinim berilgen. Onyń 330 ótinimi maquldandy. Búginde eki otbasy nesıelik kelisimshartqa qol qoıady. Budan ózge, Almaty qalasynyń ákimdigi nesıeni rásimdeýge kirisken kóp balaly otbasylardyń depozıtterine 1 mln teńgeden 44 turǵyn úı sertıfıkatyn aýdardy.
– Bul – eń aldymen az qamtylǵan otbasylar. Bizdiń mindet – nesıe boıynsha tólemdi shama jeterlikteı etý. Sondyqtan da maksımaldy soma retinde 15 mln teńge belgilendi. Alǵashqy 8 jylda tólem 76 myń teńge bolady, dedi L.Ibragımova. Sonymen qatar ol úlkenirek páter alǵysy keletin otbasylar satyp alý quqyǵynsyz jaldamaly baspana ala alatynyn aıtty. Búginde 6 myń páter tek kóp balaly otbasylar úshin satyp alý quqyǵynsyz jaldap turýǵa arnap salynýda.
