Oqý jylynyń aıaqtalýyna oraı, oqýshylar men ata-analardy mektep bitirý keshin ótkizýdiń formaty alańdatady. Mınıstrlik olarǵa ata-analar komıtetiniń aqsha jınaıtyndyǵy týraly habarlama jıi túsetindigin aıtady. Ol kóptegen ata-ana úshin otbasylyq bıýdjetke salmaq salatyny anyq. Mektep qabyrǵasynda aqsha jınalmaýy kerek dep jyl saıyn aıtylǵanmen, ata-analar balalarynyń mektep bitirý keshin sán-saltanatpen ótkizýdi doǵarar emes. Árıne, olar keshti este qalarlyqtaı, balalarǵa qyzyqty etip uıymdastyrǵylary keledi. Áıtse de, ol shyǵyndy ekiniń biriniń qaltasy kótere bermeıdi. Bul jaǵdaı jyl saıyn kóteriletin máselege aınaldy.
Mundaı habarlamalarǵa jaýap retinde Bilim jáne ǵylym mınıstrligi óz tarapynan mektep bitirý keshin aqshany únemdeý úshin dámhana, meıramhanalarda emes, mektep qabyrǵasynda ótkizýdi usyndy. Sondaı-aq mınıstrlik mektep bitirý keshiniń maqsaty sándi kıimder men mol dastarqandy kórsetý emes, balalardyń, muǵalimder men ata-analardyń esinde qalarlyq mektepishilik jıyn dep esepteıdi.
«Mektep bitirý keshiniń formaty qymbat ári sán-saltanatqa toly kesh bolmaýy kerek. Jyldar boıy tulǵany qalyptastyrýda talmaı eńbek etken pedagogtar men ata-analar jáne taıaýda mektep qabyrǵasynan túlep ushyp, úlken ómirge qadam basatyn keshtiń basty keıipkerleri — túlekter arasyndaǵy jyly dıalog túrinde ótkeni abzal» dep habarlady mınıstrliktiń baspasóz qyzmeti.
Sondaı-aq BǴM bul keshte oqýda ozat, jetistikke jetken, mektep, aýdan, qala, oblys, respýblıkalyq, halyqaralyq deńgeıdegi sporttyq, ıntellektýaldyq jarystarda jeńimpaz bolǵan, mekteptiń qoǵamdyq ómirine belsendi atsalysqan balalardy qurmetpen atap ótý oryndy ekenin atap ótti.
Mınıstrlik baspasóz qyzmetiniń habarlaýynsha, túlekter mektep bitirý keshin pedagogtardyń kómegimen kreatıvti baǵdarlama daıyndap, ata-analaryna, súıikti ustazdaryna jáne janyna jaqyn synyptastaryna alǵystaryn bildiretin maǵynaly ári qyzyqty formatta uıymdastyrýyna bolady.
Esterińizge sala keteıik, mektep bitirý keshinde sharanyń ótkizilýi,
qatysýshylardyń ómiri men densaýlyǵy úshin jaýapkershilik mektep ákimshiliginiń
moınynda bolady.
