Bıyl úshinshi jyl qatarynan uıymdastyrylǵan forýmdy ashqan E.Qarın álemdik geosaıası ózgeristerdiń aıasynda Eýrazııa jańa saıası jáne áleýmettik-ekonomıkalyq transformasııa kezeńine kiretinin atap ótti. Qazaqstan-Reseı sarapshylary ár kezde túrli alańdarda bas qosyp, eń ózekti máselelerdi talqylap, taldaý arqyly eńserip kele jatqanyn jetkizdi. Al bıylǵy is-shara Qazaqstandaǵy eń mańyzdy saıası oqıǵa – prezıdenttik saılaý qarsańynda ótip jatqanyn áriptesteriniń esine saldy.
– Osydan úsh kún buryn saılaý naýqany bastaldy. Úgit-nasıhat jumystary óte belsendi ótýde. Naýqanǵa ártúrli kandıdattar qatysýda. Onyń ishinde oppozısııa da bar. Saılaý alańynda eshkim de eshkimdi yǵystyrmaı, barlyǵyna teń múmkindik, buqaralyq aqparat quraldaryna shyǵýǵa teń quqyq, úgit-nasıhat jumystaryn júrgizýge de birdeı múmkindik berildi. Bılik shynymen de ashyq ári básekeli saılaýdyń ótýine múddelilik bildirýde. Bul – Qazaqstan Prezıdentiniń qaǵıdatty ustanymy. Elimizde bolyp jatqan saılaý prosesi taǵy bir aýqymdy prosess – bılik tranzıtiniń bóligi sanalady. Aldaǵy naýqandy bılik tranzıtiniń sheshýshi kezeńi deýge bolady, – dedi E.Qarın.
Prezıdenttiń keńesshisi elde shynaıy ózgerister bolyp jatqanyn, bıliktiń ashyq dıalogqa múddeli ekenin, saıası úderistiń belsendi júrip jatqandyǵyn da tilge tıek etti.
Jalpy, Qazaqstan-Reseı sarapshylar forýmyna qatysýshylar aımaqtaǵy elder ózderiniń halyqaralyq jáne aımaqtyq úderisterdegi rólin aıqyndap alýǵa tyrysyp jatqandaryn basa aıtty. Osyǵan baılanysty óńirlik yntymaqtastyqqa erekshe mańyz berilýde.
Sonymen birge halyqaralyq ahýal turaqsyzdyq pen saıası jáne ekonomıkalyq landshaftyń dınamıkalyq ózgerýimen sıpattalýda. Sol sebepti de álemniń aımaqtyq jáne jetekshi elderi arasyndaǵy geosaıası, ekonomıkalyq jáne tehnologııalyq básekelestik artyp keledi.
Sarapshylardyń aıtýlaryna qaraǵanda, bul turǵyda Qazaqstan men Reseı Eýrazııa ekonomıkalyq odaǵynyń mańyzdy strategııalyq seriktesteri ǵana emes, eki eldiń yntymaqtastyǵy Eýrazııadaǵy ózara is-qımyldyń formasy men mazmunyn aıqyndaıdy.
Máselen, «Valdaı» qorynyń ókili Andreı Sýshensov jahandyq geosaıası transformasııa, Eýrazııa ekonomıkalyq odaǵynyń damýy, Qytaıdyń aımaqtaǵy syrtqy saıasaty men saýda soǵystary týraly aıta kelip, bizdiń óńirdegi mamyrajaı ahýal álemge úlgi bolatynyn atap ótti.
– Ortalyq Azııa, Reseı men Qytaıdyń qarym-qatynastarynda búginge deıin qandaı da bir daǵdarystar tirkelgen joq. Qarsylas retinde de teketiresip, birin biri jaǵadan alǵan emes. Bul senimge negizdelgen turaqtylyqty, ózara dostyqty, oǵan qosa aımaqtaǵy buljymaı oryndalatyn «oıyn tártibin» qaraı otyryp, Eýrazııada dál osyndaı jaǵdaı ornaıtyn edi ǵoı degen oıǵa qalasyń. Árıne buǵan Eýropadaǵy qaýipsizdik sharalarynyń teris yqpaly boldy. Reseı men Eýropanyń ara qatynasy shıelenispegende, Eýrazııada dúrligis te, dúrbeleń de bolmas edi, – dedi A.Sýshensov.
Sarapshylar ekikúndik forýmda Qazaqstan-Reseı qatynastary men eki eldiń arasyndaǵy medıaseriktestik, Ortalyq Azııadaǵy jańa yntymaqtastyq kontýrlary, sondaı-aq áleýmettik sharttardyń ózgerýi tárizdi ózekti máselelerdi talqyǵa salady. Sonymen qatar eki eldiń arasyndaǵy halyqaralyq kún tártibinde turǵan mańyzdy máselelerdi, aımaqtyq saıasat pen qaýipsizdik salasyndaǵy sońǵy oqıǵalardy taldap, aradaǵy ekonomıkalyq jáne gýmanıtarlyq baılanystardy qalyptastyrý men nyǵaıtý máseleleri boıynsha pikir almasady.
