Bul júıe nesıeleý ótinimderin qarastyrý ashyqtyǵyn qamtamasyz etedi. Talonda nesıeleý sharttary, tapsyrylǵan qujattardyń tizimi, ótinim berilgen kúni men ótinimdi qarastyrý aıaqtalatyn kún kórsetiledi. О́tinimdi qarastyrý boıynsha bıznes-prosess tolyǵymen saıtta kórsetiledi. Klıent óz ótiniminiń jolyn kazagro.kz portalyna tirkelip, kóre alady.
Talonda klıenttiń aty men nesıeleý baǵdarlamasy, qarjylandyrý kózi, soma, prosenttik ústeme, negizgi borysh pen syıaqy boıynsha jeńildetilgen merzim, ótinimdi qabyldaǵan menedjerdiń málimetteri men baılanys telefony kórsetiledi. Talon klıenttiń qarjylandyrýǵa qajetti qujattar paketin tapsyrǵanyn dáleldeıdi. Talon basylǵannan keıin nesıeleý ótinimi qarastyrýǵa jiberiledi. Klıent kazagro.kz portalyndaǵy jeke kabınetke kirip, óz ótinimi boıynsha júrip jatqan prosesti bile alady.
«Talondyq júıeniń negizgi artyqshylyqtarynyń birine toqtalatyn bolsaq, buryn klıent nesıe ótinimin tapsyryp, uzaq ýaqyt jaýap kútetin. Qujattardyń tolyq paketin tapsyrǵanyn rastaı almaıtyn. Jaýapty qyzmetkerden belgili bir merzimnen keıin jaýap ala almaıtyn. Klıentke ótinimine qatysty kimnen ne suraý kerektigin bilý qıynǵa túsetin. Al talondyq júıede tapsyrylǵan ótinimmen tikeleı aınalysatyn qyzmetkerdiń aty-jóni, baılanys telefony kórsetiledi», deıdi «Aýyl sharýashylyǵyn qarjylaı qoldaý qory» AQ nesıeleý departamentiniń dırektory Gerrard Baal.
Taǵy bir máseleni aıta ketken jón. Bul – ótinim tapsyrǵannan bastap, klıenttiń nesıe alýyna ruqsat berilgenge deıingi aralyqta ketetin ýaqyt máselesi.
«Kóp jaǵdaıda ýaqyt kepildikke qoıylatyn múlikti zańdastyrmaǵandyqtan sozylyp ketedi. Mysaly, keıbir adamdardyń aýlasynda qorasy bolǵanymen, bul tehpasportta kórsetilmeýi múmkin. Iаǵnı, mal ustaıtyn qorasy qujatpen zańdastyrylýy shart. Budan basqa da kepildikke qoıatyn jer ýchaskeleri, tehnıkalary jáne taǵy basqa da múlikteri zańdastyrylǵan bolýy tıis. Sondyqtan, ótinimdi qaraý ýaqyty qujattardy tolyq jınap, ótinim tapsyrylǵan kúnnen bastap esepteledi. Sonymen qatar ótinimderdi qaraý merzimi ońtaılandyryldy», deıdi nesıeleý departamentiniń dırektory G.Baal.
Bıyl ótinim bergen zaemshylar alǵash ret talondyq júıeni paıdalanyp, onyń artyqshylyqtaryna kóz jetkizdi. Bul júıeni burynǵylarmen salystyrýǵa múlde kelmeıdi. Alys aýyldarda turatyn sharýalar jolǵa aqsha shyǵaryp, ýaqytyn ketirip sabylmaıtyn boldy. Munyń aldynda qosymsha suraq týyndasa nemese keıbir talaptardy túsinbeı jatsa, keńsege kelýge jáne kezekke turyp ýaqyt joǵaltýǵa týra keletin. Al talondyq júıe – ótinimniń qaralý prosesin aýylda otyryp-aq kórýge múmkindik beretin qarapaıym júıe. Ásirese shalǵaı aýyldarda turatyn azamattar úshin óte qolaıly. Sondyqtan, nesıe alýǵa ótinim beremin deýshiler osy júıeni meńgerip alǵandary abzal. Bul úshin oblys ortalyqtaryndaǵy, Nur-Sultan, Almaty jáne Semeı qalalaryndaǵy «Aýyl sharýashylyǵyn qarjylaı qoldaý qory» aksıonerlik qoǵamynyń fılıaldaryna habarlasý qajet nemese baryp tolyq málimet alǵan durys. Aldyn ala keńesti 8 800 080 3505 tikeleı jeli telefony arqyly alýǵa bolady.
