Shyǵarmashylyq deńgeıi joǵary, ózderiniń kásibı qalyby men mashyǵyn qalyptastyra bilgen bul ujymdardyń bıik ónerine qol soǵýshylar az emes. Olar tipti Qazaqstannyń Belgııadaǵy elshisi Aıgúl Quspannyń arnaıy shaqyrtýy boıynsha Eýropa elderinde konsert qoıyp qaıtty. Sonymen birge delegasııa quramyndaǵy aqtóbelik qolóner sheberleri kári qurlyqtyń jurtshylyǵyna óz týyndylaryn usyndy.
Brıýssel men Lıýksembýrg qalalarynda eýropalyq kórermenderge naýryz merekesi aıasynda ázirlengen konserttik baǵdarlamalar úlken tabyspen ótkizgenin aıta ketken jón. Fılarmonııa ánshileri Nurtas Omarov pen Gúlnázıre Saǵynǵalıeva oryndaǵan halyq ánderi men jyr-termelerdi eýropalyqtar óte jyly qabyldaǵan. Al «Aqqý» bı ansambliniń myń burala bılegen arýlary qara jorǵany sahnaǵa shyǵarǵan kezde de rızashylyq pen súıispenshilik tanytqandar kóp boldy. Sondaı-aq A.Jubanov atyndaǵy halyq aspaptar orkestri Mosarttyń álemge áıgili shyǵarmalaryn dombyra únimen jetkizgende konsert zaly teńizdeı tolqydy, deıdi óner sapary jóninde Ǵ.Jubanova atyndaǵy Aqtóbe oblystyq fılarmonııasynyń dırektory Elýbaı Kenjalıev.
Talǵamy bıik, óneri jan-jaqty damyǵan shetel ókilderi elimizdiń batys óńirinen barǵan ánshilerdiń, kúı men bı sheberleriniń ónerine joǵary baǵa bergeni atap aıtýǵa turarlyq. Ásirese, ulttyq ónerimizdiń qaıtalanbas kolorıti men naqyshtary tánti etkeni ańǵarylady. Osyndaı oı túıinin aqtóbelik qolóner sheberleriniń qolynan shyqqan ár túrli buıymdarǵa qatysty da aıtýǵa bolady. Eýropalyqtardyń halqymyzdyń ejelgi ulttyq kolóner týyndylaryna degen qyzyǵýshylyǵy, etnostılge degen qurmeti erekshe ekenin baıqadyq, dedi budan ári joǵaryda atalǵan óner shańyraǵynyń jetekshisi E.Muhambetova. Bir sózben aıtqanda óz ónerlerimen eleń etkizgen uıymshyl ujym bul kúnderi ózderiniń 75 jyldyq bıik belesin atap ótýge bir kisideı jumylǵan.
AQTО́BE
