О́r Mahambet óz aǵam – Abaılap júr!
Joldas boldym bóriniń bórisimen,
Arýaqtandym solardyń perisimen...», dep qazaq poezııasynda óz bolmysymen erekshelenip, qaryshty qalamymen daralanǵan Esenqul Jaqypbekti ádebıettegi aǵalary«Esaǵa» dep erkeletken saǵynyshqa toly estelikterdi Almatyda ótken jyr keshinde tyńdadyq.
Ulttyq kitaphana tórinde ótken bul keshtiń bir ereksheligi esenqultanýǵa bastaǵan tyń jobalardyń júzege asýynda edi. Aqynnyń kózi tirisinde shyǵarmalary on shaqty basylym bolyp jaryqqa shyqsa, «Uly óleń quıylyp tur ózegime», «Esaǵa» kitaptary tórt jyl boıy jınaqtalyp, sonaý 1970-jyldardan bergi aralyqtaǵy óleńderi, sondaı-aq aıtystary «Jambyl» jáne «Aqqaınar» baspalarynan oqyrmanǵa jol tartyp otyr.
О́zinen bes-alty jas kishiligine qaramastan kózi tirisinde Esenqul Jaqypbekti «Esaǵa» dep erkeletip ketken aqyn, dramatýrg, Memlekettik syılyqtyń laýreaty Nurlan Orazalın tebirenisti bir keshtiń kýási bola otyryp, aqynnyń rýhymen tildesip, onyń jan dúnıesine qaıta barlaý jasap otyrǵanyn jetkizdi. «Báıgege túsetin, alamanǵa shabatyn baıyrǵynyń júırikteri tárizdi Esaǵańnyń poezııadaǵy orny bólek edi. Aýyzeki ádebıetiniń jýharlarynan nár alǵan Esenqul esimi bizge shala jansar bolyp jetken aıtys ónerine jan bitirgen synaý júırikterdiń qatarynda atalady. Esenqul keıde burap, keıde shanshyp, qaýyp, taýyp aıtatyn aıtyskerlik ónerimen elin tánti etti. Seıdahmet aǵamyzdyń ózi alańdaýshylyq bildirip, osyndaı óleńderin de kóp jazsa eken dep tilegen-di. Muqaǵalı qaıtqanda qazaq qalaı kúńirense, óleńdi shynaıy tanıtyn, bas ıetin jurtshylyq Esenqul ketkende dál osylaı jınalǵany bar. Esenquldyń dáýiri endi bastalyp keledi» dep támamdady júrekjardy pikirin Nurlan Myrqasymuly.
Esenqul jyrlaryn tyńdaýǵa asyǵyp jetken jurtshylyq aldynda Nurlan Orazalın bas bolyp Jumabaı Shashtaıuly, Ǵalymjan Jaılybaı, Baýyrjan Jaqyp, Anarbaı Boldybaı jańa shyqqan kitaptardyń tusaýkeser rásimin jasady.
О́z pikirin «Esenqul tanylǵanǵa deıin táp-táýir aqyn edim» dep ázil-qaljyńmen bastaǵan jazýshy Jumabaı Shashtaıuly aqynnyń Ospanhan aǵamyz sııaqty syqaqqa sheberligin, jýrnalıst bolýǵa da ábden mashyq ekenin jetkizdi. «Almatydan jyraqta júrip jazǵan aqyn óleńderiniń mazmuny ulttyq ereksheligimen dara. Almatyda turaqtap qalǵan kúnniń ózinde onyń buǵaýǵa kónbeıtin shyǵarmashylyǵy erkindikti ańsap turatyn. Sondyqtan da Esenqul óleńderiniń bitim-bolmysy erekshe», dep atap ótse, «Kúpáıke kıgen poezııa» keshinde Esaǵasyn somdaǵan Qazaqstannyń eńbek sińirgen qaıratkeri Bekjan Turys «Aldaı-aý» ánin oryndap, aqyn aǵasy haqynda tebirenisti oılaryn ortaǵa saldy.
Al on eki jasynan aqyn aǵasynyń sharapaty men shapaǵatyn kórip ósken Aqan Ábdýálıev sonaý 2008 jyldar qoınaýyna búkken saǵynyshqa toly syrymen bólisip, aqyn jyrynyń asqaq ekendigin ýaqyt enshisine tastady.
