«Kel, bıleıik» qazaq bıi horeografııalyq baıqaýyn ótkizgende ulttyq bıimizdiń baı maǵynasyn, áserli de tartymdy kórinisterin jandandyrý jáne jalpy bı óneriniń múmkindigi men órisiniń óte zor ári bıik ekenin alǵa tarta otyryp, onyń joǵary dárejede órken jaıýyna atsalysýdy, kórermenge jetkizýdi maqsat tuttyq» deıdi Áýlıekól aýdany ákimdiginiń mádenıet jáne tilderdi damytý bóliminiń bas mamany Sholpan Balyqbaeva.
Baıqaýǵa Áýlıekól aýdanyndaǵy aýyldardan 5 ujym qatysty. Baıqaý baǵdarlamasynda qazaq bıiniń ár túrli baǵyttary boıynsha bı nusqalary usynyldy. Bı óneriniń qudyretin sezinip, kıeli sahnany qyzdyrǵan bı ujymdary birinen biri asyp túsip, kórermenderdi óz sheberlikterimen, ónerimen tań qaldyrdy. Degenmen, báıgeniń aty – báıge, úzdikter anyqtaldy. Qazaq ulttyq bıin oryndap, óner kórsetken Moskalev aýylynyń «Adıelta» bı ujymy 1 oryn (jetekshisi Oksana Mısıýra), Q.Turǵynbaev aýylynan «Ádemi–aı!» bı ujymy 2 oryn (jetekshisi Aınash Shınkentaeva), Qusmuryn kentinen kelgen «Asar» bı ujymy 3 oryn (jetekshisi Ybysheva Elmıra) aldy. Sonymen qatar Lesnoı aýylynyń «Aınalaıyn» (jetekshisi Ásel Syzdyqova) men Baǵanaly aýylynyń «Iskorka» bı ujymdary (jetekshisi Irına Abramova) is-sharaǵa belsendi qatysyp, alǵys hattarmen marapattaldy.
Áýlıekól aýdany ákimdiginiń mádenıet jáne tilderdi damytý bóliminiń basshysy Jibek Toqaeva jobaǵa qatysqan bı ujymdaryna óz alǵysyn bildirdi.
«Týǵan halqynyń ónerin qurmetteýge, halyq arasynda qazaq ulttyq bıiniń qundylyǵyn arttyrý, rýhanııatty saqtaý jáne damytý bizdiń basty maqsatymyzdyń biri, bul aldaǵy ýaqytta dástúrli jalǵasyn tabatyn bolady» dedi Jibek Kákimjanqyzy.
Qostanaı
