Aıtsa, aıtqandaı, ol uzaq jyldar kórnekti jazýshy, birtýar qaıratker Sherhan Murtazanyń tálimin aldy, seriktes inisi bolyp janynda ilesip júrdi, tábárigin juǵysty etti. Sodan da bolar bir sátte kúndeı kúrkirep, naızaǵaıdaı sharpysyp, jaýyndaı sirkirep, artynsha jarqyraǵan shýaqtaı jaırańdaıtyn jaısań da batyr minezi bar.
Áńgimege arqaý bolyp otyrǵan belgili jýrnalıst Maqulbek Rysdáýlet jetpistiń jotasyna shyqqan búgingi belesine deıingi ǵumyrynda qolynan qalamyn túsirmeı kele jatqan qarymdy qalamger. Ne jazsa da ónikti, kórikti jazady, ornyqty oı tarqatady. Ataqtaryn sanamalasań, Qazaqstan Jýrnalıster odaǵynyń, Baýbek Bulqyshev atyndaǵy syılyqtardyń laýreaty, Qazaqstannyń Qurmetti jýrnalısi, búkilodaqtyq konkýrstyń júldegeri. Jýrnalıstıka salasyndaǵy alǵashqy eńbek jolyn Jezqazǵan oblystyq «Jezqazǵan týy» gazetinde bastady. Jıyrma jylǵa jýyq Saryarqa tórinde qalamyn ushtady, kásipqoı jýrnalıst retinde shyńdaldy. О́ńirdegi qany tamǵan talaı ózekti máselelerdi basylym betinde problema etip kóterdi, qalamynyń qýatymen súringendi súıeýge, jyǵylǵandy demeýge adal qyzmet etti. Ken qoparǵan kenshiler men mys balqytqan metallýrgter, óristi qoıǵa toltyrǵan shopandar men ekonomıkanyń qaryshtap ósýine úles qosqan iri basshylar, jer baılyǵyn el ıgiligine usynǵan geologtar men bar baılyqty uqsata bilgen baıytýshylar, aýyl men qala tarıhy, «Karlag», «Steplag» tutqynynda bolǵan «halyq jaýlary» týraly jazǵan maqalalary men ocherkteri árkez joǵary baǵalanyp keledi. Kezinde iri qurylys alańyna aınalǵan Jáıremniń baılyǵy men bolashaǵy da onyń qalamyna ilingen. Uly Otan soǵysy ardagerleri týraly ol óte kóp ocherk jazǵan jýrnalıst. Jeńis paradyna qatysqan maıdangerler týraly jazǵan ocherkteri óshpes erliktiń galereıasyna aınaldy.
Maqań el gazeti – «Egemen Qazaqstan» gazetinde menshikti tilshi qyzmetin atqarǵan jyldaryn asqan jylylyqpen eske alady. Onyń eń aldymen aýyzǵa alatyny Talas gaz ken ornyn ıgerý týraly jazǵan maqalalary. Ol bul ómirsheń taqyrypty bas basylymda úzbeı jazyp, jýrnalıstik zertteýleri arqyly Talas jerindegi Amankeldi gaz ken ornyn ıgerý el baılyǵyn arttyratyndyǵyn dáleldeı bildi. Osy eńbegi úshin ol «Talas aýdanynyń qurmetti azamaty» atandy. Qazaq halqynyń sany ósýi úshin ana men balany aıalaı otyryp, olarǵa qamqorlyqty memleket tarapynan kúsheıtý jónindegi problemalyq maqalasy da uzaq ýaqyt el talqysyna tústi. Ol jeti bala týǵan anaǵa «Altyn alqa», bes bala týǵanǵa «Kúmis alqa» berý týraly naqty usynys jasady. «Egemenniń» sol usynysy kezinde Úkimetke jiberilgen edi. Aqyry Elbasynyń bastamasymen bul is baıandy boldy.
Qalamger tynymsyz eńbektenýdiń nátıjesinde, onnan astam kitaby oqyrmanǵa jol tartty. Sonymen birge onnan astam ujymdyq kitaptarǵa ocherkteri men áńgimeleri, povesteri men hıkaıattary, esseleri men pýblısıstıkalyq maqalalary endi. Kórkem ádebıet salasynda jazǵan «Juldyzdardyń jaryǵy», «Kúmis beldik», «Jelsaz», «Juldyzdy ómir», «Tý ustaýshy», «Qus joly», «Baqaterek», «Ábdir Saǵyntaev» kitaptary oqyrmandaryna jasaǵan tartýy. Onyń qazaqtyń birtýar azamaty, kórnekti ǵalym, qaıratker Qanysh Sátbaev týraly derekti povesi Qazaqstan Jazýshylar odaǵy men «Qazaqmys» korporasııasynyń Qarsaqbaı mys qorytý zaýytynyń 80 jyldyǵyna oraı jarııalaǵan konkýrsynyń proza janry boıynsha bas báıgesine ıe boldy.
Keıingi jyldary Jambyl oblysy memlekettik arhıviniń dırektory qyzmetin abyroımen atqardy. Zeınetke shyqqasyn muraǵatta arhıvtanýshy bolyp jumysyn jalǵastyrýda. Jazýǵa ábden mashyqtanǵan qalamger arhıv salasyna kelgeli kópten shań basqan qujattardy qaıta tiriltip, tyń derekterden qurylǵan shyǵarmalaryn úzbeı oqyrmanyna usynyp keledi. Tarıhı derekterdi taqyrybyna tamyzyq etip, oıly maqalalar men birge tushymdy ádebı týyndylar jazýda. Onyń «Máńgilik erlik», «Erlik umytylmaıdy», «Jazyqsyz jazalanǵandar», «Táýelsizdik-týymyz!», «Tarıh tamyrlary», «Eskertkishter – el tarıhy», «Jambyl oblysy:1939 jyl», «Jambyl oblysy – 75 jyl: jylnama-shejiresi», «Qazaq handyǵy – eldiktiń bastaýy», «Jasampaz 25 jyl», «Maıdan hattary», «Soldat jary», «Konfıskasııa» atty kitaptary ólke tarıhyn tanýda asa qundy eńbek bolyp sanalady.
Qoly qalt etse qoǵamdyq jumysqa belsene aralasyp oblystyq aqparattyq-nasıhat tobynyń, oblystyq onomastıka komıssııasynyń múshesi retinde árdaıym jurtshylyqtyń ortasynan tabylyp júrgen qalamger óziniń jazýǵa degen qulshynysyn da «qazaqqa áli de bererim kóp» degen oıymen ańǵartty.
Qýat BORASh,
jýrnalıst-pýblısıst
