Túp tazalaý jumystarynyń merdigeri «Pavlodar ózen porty» AQ óz jumystaryn Jaıyq ózeni saǵasyndaǵy Iаıskıı kanaly men Qıǵashtyń Ganıýshkın jáne Jarqosyn kanaldarynda júrgizip keledi.
Bular – kóktemgi ýyldyryq shashý úshin balyqtardyń ózenge ótetin negizgi arnalary. Olar on shaqty jyldar tóńireginde tazalanbaǵan, sonyń saldarynan taıyzdanyp ketipti.
«Mynaý ýaqtyly qolǵa alynǵan jumystar jáne olardyń mańyzdylyǵy da óte joǵary» dep atap ótti aımaq basshysy. Túp tereńdetý jumystarynyń jalpy uzyndyǵy bul jerde shamamen 45,5 km. Onyń ústine, teńiz baǵytyna qaraı tereńdigi 2,5 metr, eni 25 metr bolatyn jańa arnanyń qurylysy qarastyrylǵan.
Osy sapar qorytyndysymen oblys ákimi Nurlan Noǵaev «Aq Jaıyq» tabıǵı rezervaty aýmaǵynda týrızmdi damytý jáne qosymsha baqylaý qosyndaryn ornatý jóninde tapsyrma berdi. Qosyndardy ornatý sońǵy ázirde jıilep ketken dala órtteriniń jáne balyq saýdasynyń zańsyz aınalymynyń aldyn alýǵa septigin tıgizedi.
– Shyǵyndy az talap etetin bul qurylym rezervat qyzmetkerleriniń jumysyn jeńildetip, ári tıimdiligin arttyrady. Onyń ústine, alys qashyqtyqty da qadaǵalaýǵa múmkindik beretin arnaıy drondardy satyp alýdy da qarastyryńyzdar. Biraq, munyń barlyǵy da jergilikti ań men qustarǵa keseli men kedergisin tıgizbeýi kerek. Serik Jambyluly, osy jyldyń sońyna deıin qosymsha qadaǵalaý qosyndaryn salý men drondardy satyp alyp berý jaǵdaıyn oılastyryńyz, - dep ákim orynbasaryna tapsyrma berdi.
«Aq Jaıyq» tabıǵı rezervatynyń basshysy Nurbolat Kárimovtyń sózinshe, oblys ákiminiń týrızmdi damytý baǵytyndaǵy tapsyrmalaryn oryndaý barysynda, rezervat aýmaǵynda birneshe týrıstik baǵyt jasaqtalyp jatqan kórinedi. Sonymen qatar, balyq qorǵaý boıynsha da kóptegen shara júzege asyrylyp, «Bekire - 2019» aldyn alý jedel áreketteri boıynsha da bekitilgen ister atqarylyp keledi.
– «Bekire - 2019» sharasy bastalǵannan beri balyq saýdasynyń zańsyz aınalymyna qatysty ákimshilik quqyq buzýshylyq baǵytynda 49 fakti tirkelgen. Mysaly, ótken jyldyń osy kezeńimen salystyrǵanda 26 fakti anyqtaldy. Onyń ishinde ýyldyryq shashý kezinde balyq aýlaý men rezervat aýmaǵynda bolý sekildi jaǵdaılar da tirkelgen. Týrıstik baǵyttarǵa keler bolsaq, qoryqtyq aımaqta biz arnaıy súrleý joldar júrgizgenbiz. Qyzmetkerlerimizdiń kómegimen týrıster rezervat aýmaǵynda serýendep, arnaıy motorly qaıyqtarmen Kaspıı teńizine de shyǵýǵa múmkindik qarastyrylǵan. Sonymen qatar, arnaıy belgilengen jerlerde salmaǵy bes keliden aspaıtyn balyqtardy da qarmaqpen aýlaý ruqsat etilgen. Sheteldik týrıster rezervatqa zor qyzyǵýshylyq tanytyp otyr. Qazir ınfraqurylymdy damytý jaǵyn qarastyrýdamyz, - deıdi Nurbolat Kárimov.
Burynǵy «Atyraýbalyq» zaýytyna barǵan kezde anyqtalǵanyndaı, qazir kásiporynnyń balanstyq qunyn anyqtaý sharalary júrgizilip jatyr. Syrttaı qaraǵannyń ózinde de, zaýyt nysandary men ǵımarattary turǵyndarǵa qaýip tóndirip turǵany baıqaldy. Apatty ǵımarattar qulaýdyń az-aq aldynda tur.
Bos qalǵan kásiporyn aýmaǵynda aımaq basshysy sısternalardan mazýttyń tógilip jatqanyna nazar aýdartty.
– Bul Jaıyq ózeni jaǵasyna taıaý jer, aǵylyp jatqan maı tabıǵatqa zııanyn tıgizýde. Sizdiń qyzmettik maqsatyńyzdyń quzyryna bolǵan kemshilikterdi anyqtaý ǵana emes, solardy joıý da kiredi. Tabıǵatqa keltirilgen eleýli nemese eleýsiz zalaldyń bolmaıtyny týraly jaýapkershilikti jiti túsingen abzal. Tabıǵatqa keltirilgen zalal - orny tolmaıtyn nemese zalasyzdandyrylýy óte kúrdeli apattar. Taıaý arada jerdi mazýttan tazalaý kerek, - dedi N.Noǵaev.
Atyraý qalasynyń ákimi Álımuhammed Quttymuratuly naqtylaǵandaı, burynǵy balyq óńdeý zaýytynyń aýmaǵy qalalyq ákimdikke qaraıdy eken, balanstyq quny anyqtalǵan soń, munda jańa yqsham aýdan salý josparda bar.
Atyraý
