Altaı aýdanynda qazaq kúresinen 2006-2009 jyldary týǵan balalar arasynda oblystyq chempıonat ótti. Erekshe atap óterligi, dúbirli doda osy sport túrinen qalada alǵash ret uıymdastyryldy.
О́ńirdiń túkpir-túkpirinen 60-qa jýyq balǵyn balýandardyń basyn qosqan saıysqa qurmetti qonaq retinde «Qazaqstan Barysy» jáne «Álem Barysy» týrnırleriniń jeńimpazy, dańqty balýan Aıbek Nuǵymarov pen onyń bapkeri, QR Eńbek sińirgen jattyqtyrýshysy Serik Qorjykenov qatysty. Árıne, qazaq kúresinen Azııa, Álem chempıony atanǵan Aıbektiń kelýi jas sportshylarǵa shabyt berip, jigerlendire túskeni anyq. Sodan da bolar jas balýandar has balýanmen emin-erkin áńgimelesip, sýretke túsip, selfı jasap jatty.
«Qazaq kúresiniń tanymaldylyǵy kúnnen kúnge artyp keledi. Memleket tarapynan jaqsy qoldaý bar. Men Altaı qalasyna aýdan ákiminiń arnaıy shaqyrýymen alǵash ret kelip otyrmyn» deıdi Aıbek Nuǵymarov.
Búginde qazaq kúresi Altaı aýdanynda da jaqsy damyp keledi. «Mektebimizde eki bapker jumys isteıdi. Erbol Aýǵambaev pen Samat Kaktaev 50-ge jýyq balany jattyqtyrady» deıdi Altaı qalasyndaǵy balalar men jasóspirimder sport mektebiniń dırektory Murat Baıbolov.
Shyǵys Qazaqstan oblysy,
Altaı aýdany
