...áserimen bólisedi
Ánshi apamyzdy saǵynyp qalyppyz
Pavlodar qalasynda ardaqty da asyl ánshi apamyz Roza Baǵlanovany eske alý keshi ótip, ánshiniń ásem daýysyn saǵynǵan halyq qalalyq mádenıet saraıyna lyq toldy. Keshke jınalǵandar aldymen Roza apamyzdyń syńǵyrlaǵan ásem ánderin tyńdap, ekrannan apamyzdyń jarqyn beınesin kórip rıza bolysty. Kesh barysynda Roza Tájibaıqyzy týraly derekti fılmnen úzindiler berilip, ardaqty apamyzdyń biz bile bermeıtin ómir sátterin tamashaladyq.
Eliniń qamyn oılaǵan ánshi apamyz qazaq eliniń maqtanyshyna, Almaty qalasynyń sánine aınalǵan ásem saraı saldyrtty, mádenıetimizdiń órkendeýine óz úlesin qosty. Sonaý surapyl soǵys jyldarynda aldyńǵy shepke baryp, qońyraýdaı syńǵyrlaǵan únimen án salyp, jaýyngerlerdiń eńsesin kótergenin bilemiz.
Roza Baǵlanova «Sahna sandýǵashy» ǵana emes, sahnanyń kórki de edi. Kıim kıisi, sahnada ózin ustaýy, júris-turysy eshkimge uqsamaıtyn erekshe bolatyn. Apamyz ánderdi aıtqanda ár sózdiń maǵynasyn tereń túsinip, sol maǵynaǵa sáıkes daýys yrǵaǵyn, daýys ásemdigin saı keltire shyrqaıtyn, sózderinen mol adamgershilik qasıet, kórermenge degen úlken qurmet sezilip turýshy edi.
«Halyq Qaharmany» ataǵyn alǵan ardaqty ánshi qurmetine Almaty qalasyndaǵy Jastar men stýdentter saraıy Roza Baǵlanova atyndaǵy jastar men stýdentter saraıy dep atalsa nur ústine nur bolar edi.
Álıma AITKENOVA,
zeınetker ustaz
Pavlodar
...dabyl qaǵady
Urlyqqa tusaý bolmaı tur
Sońǵy ýaqytta bizdiń shaǵyn aýyldyń aýmaǵynda jylqy urlaý derekteri kóbeıip barady. Áıtse de buǵan qatysty tekserýler men tergeý amaldary júrgizilmeı keledi. Máselen, ótken 2018 jyly bizdiń Taldyq aýylynyń ózinen kóptegen jylqy joǵalypty. Onyń 13-i meniń ıeligimdegi seriktestiktiń jylqylary. Iri kólemdegi mal urlyǵy bolǵan soń oǵan quqyq qorǵaý organdary tıisti tergeýler júrgizýi qajet emes pe? Alaıda, bulaı bolmaı otyr.
Bul máseleni aýdandyq ishki ister bóliminiń bastyǵy orynbasaryna birneshe ret aıtqan edik. Alaıda, ol tergeýshilerdiń jetispeı jatqanyn aıtýmen ǵana shektelip júr. Basqa amalym qalmaǵan soń janýarlardy izdeýge ózim kiristim. Bul áreketim belgili bir deńgeıde nátıje berdi de.
Sóıtip joǵalǵan jylqylarymnyń bireýin Embi qalasy mańyndaǵy aýyldyń birinen taýyp, alyp keldim. Al ekeýin soıyp tastapty. Men báriniń baǵyty men deregin siltep tursam da, tergeý amaldarynyń júrgizilmeı júrgeni qynjyltady. Bul jaǵdaıdy Aqtóbe oblystyq polısııa departamentiniń bastyǵy tikeleı óz baqylaýyna alsa, múmkin bir nátıjesi shyǵar dep úmittenemin.
Qamıdolla JÚSIPOV,
Taldyq aýylyndaǵy
«Qulager» JShS-niń quryltaıshysy
Aqtóbe oblysy,
Áıteke bı aýdany
...rızashylyq bildiredi
Ulttyq ónerdi ulyqtaǵan fılm
«Qazaqstan» ulttyq telearnasynan «Kúı ǵumyr» atty teleserıal birazdan beri óz kórermenderine usynylyp keldi. Turaqty kórermen retinde kún saıyn kezekti serııasyn asyǵa kútetinbiz. 20 bólimnen turatyn serıal bizge qatty unady. Kezinde tamashalaǵan «Bolashaq» atty lentadan keıingi aýyz tushynyp kórgen týyndymyz osy boldy. Ssenarııin jazǵan aqyn qaryndasymyz Gúlnár Salyqbaı eken.
Ulttyń máńgilik asyl qazynasy – kúmbirlegen kúıge arnalǵan fılmniń oqıǵasy da qyzyqty órilip otyrady. Keıbir jekelegen epızodtary bolmasa, oqıǵalary da nanymdy. Bizdiń oıymyzsha, tájirıbeli akterler oınaǵan rólder sátti shyqqan. Kúılerdi oryndaǵan Saıan Aqmolda fılmniń ajaryn odan ári asha túsken.
Aıtaıyn degenim – fılm sátti shyqqan, sonysymen de bizge unady. Aldaǵy ýaqytta osyndaı dúnıeler kóz qýanyshymyzǵa aınala berse eken degen tilek qaldy kóńilde.
Káribaı ÁMZEULY,
zeınetker
Túrkistan oblysy
...maqtan tutady
Koreıadan júldemen oraldy
Balalardyń qabiletine zer salyp, daryndylardy tanı bilý qajet. Osy maqsatty alǵa qoıǵan Býrabaı aýdanyndaǵy Shýchınsk qalasynyń №9 mektep-gımnazııasy oqýshylardy mektep qabyrǵasynan ǵylymı izdeniske baýlyp, jetistikterge jetkizip jatqany qýantady. Nátıje tyńǵylyqty jumyspen, júıeli basqarýmen keletini sózsiz. «Máńgilik el ıdeıasy – mektepte» jobasy negizinde júrgizilip jatqan jańashyldyqqa umtylysty naǵyz básekege qabiletti tulǵa daıarlaýdaǵy utymdy is deýge bolady.
Sonyń ishinde «Otandyq ónim, ulttyq brend» baǵyty boıynsha oqýshylardy týǵan ólkeniń tabıǵatyn, tynys-tirshiligin zerttep, otandyq ónimdi qaıta jańǵyrtyp, ulttyq brendke aınaldyrýdaǵy jetistikterdi maqtanyshpen aıta alamyz. О́tken jyly oqýshylarymyz saýmal sútten jasalǵan balmuzdaqtyń shıpasyn álemge áıgilegen bolatyn.
Sol jolmen bıyl da 11-synyp oqýshysy Aqqý Júkebaı Ońtústik Koreıanyń Tedjon qalasynda ótken «Jas ǵalym» ǵylymı joba jarysynda «Otandyq ónim – Qurtjıdek» atty ǵylymı jobasyn qorǵap, júldeli II orynǵa ıe boldy. Osy jobaǵa jetekshilik etken qazaq tili men ádebıeti páni muǵalimi Janar Qýandyq pen bıologııa páni muǵalimi ári mektep dırektory Bıbigúl Kóshekovanyń eńbegi óte zor. Sh.Ýálıhanov atyndaǵy Kókshetaý ýnıversıtetiniń oqytýshylary men Kókshetaý sút zaýyty qyzmetkerleriniń qoldaýymen jasalǵan bul joba bolashaqta ulttyq brendke aınalyp, el ıgiligine jaraıdy degen senimdemiz.
B.BEKETAI,
dırektordyń beıindi oqytý
jónindegi orynbasary
Aqmola oblysy
