Alǵashqy ulttyq sýretshiler Ábilhan Qasteev, Qojahmet jáne Qulahmet Qojyqovtardyń jumystarynda qazaq dalasynyń jartylaı kóshpeli ómirden ajyrap, jańa ónerkásiptik kelbet alǵan jańa dáýiriniń tynysy boıamasyz sýretteldi. Qazaqstanǵa kelgen I.Balhozın, B.Ýrmanche, N.Iаgodkın, A.Rıttıh, R.Velıkanova, P.Zalsman jáne taǵy da basqa sýretshiler atqarǵan kásibı beıneleý júıeleriniń aqparatyn taratýshylyq qyzmetteri portretter men peızajdyq kórinisterdiń qaınaǵan sheberhanasy boldy dep aıta alamyz. KSRO-nyń úzdik ınstıtýttarynda kásibı bilim alǵan bir top talantty sýretshiler shyǵarmashylyq qyzmetterin óz elderinde jalǵastyrdy, sonyń ishinde birqatar týyndygerler akvareldik keskindemege de aıryqsha den qoıdy.
«Qazaqstan akvareli: Keshe jáne búgin» kórmesi búgingi kún turǵysynan akvarel jaýharlaryn kórip, ańǵaryp-uǵynýǵa qolǵa túse bermeıtin múmkindik týǵyzyp otyr. Respýblıka óneriniń qalyptasýynyń ár túrli kezeńderindegi sýretshilerdiń shyǵarmashylyǵyndaǵy erekshelikter bizge jaqsyraq seziledi. Qazaqstan keskindemeshileriniń shyǵarmashylyǵynda natıýrmort eshqashan da basty janr bolyp eseptelmegenin eskergen jón, alaıda O.Kolomyseva, L.Kýznesova, G.Mádıbıeva jáne taǵy basqalardyń tunyq tabıǵattyń este qalar sátterin sıpattaıtyn kompozısııalary akademııalyq ónerdiń stıldik jáne obrazdyq-plastıkalyq erekshelikterin saqtaǵan erekshe keskindemelik taqyryp retinde qabyldanady», – deıdi ónertanýshy Svetlana Kóbjanova.
Kórmede óńirimizdegi osynaý degdar ónerdiń qarqyn alýyna serpin bergen E.Sıdorkın, A.Ǵalymbaeva, Ú.Ájıev syndy sheberlerdiń akvareldik jumystary ózine birden baýrap alady. Eń bastysy, shyǵarmashylyqtary men temperamentteri ártúrli sýretshilerdiń kúrdeli ári kóp qyrly tehnıkada oryndaǵan shyǵarmalary ár darynnyń ózine ǵana tán qaıtalanbas qoltańbasyn áıgilep tur. Qazaq dalasynyń sulýlyǵy, kóz tundyrar tumsa tabıǵattyń san alýandyǵy men aýqymy túrli býyn sýretshileriniń kenebindegi basty taqyrypqa aınalǵan. Týyndylary kórmege qoıylǵan sýretshilerdiń árqaısysy dara keskindemelik-plastıkalyq obraz jasap, qorshaǵan álemdi uǵyný men zertteýdiń ózindik tásilderin tap basqan.
ALMATY
