Metrologııa – ólsheý birligin qamtamasyz etetin ádister men quraldar jáne kerekti dáldikke jetý tásilderi týraly ǵylym. Qazaqstannyń Úshinshi jańǵyrýy, Indýstrııalandyrý baǵdarlamasy sııaqty kóptegen memlekettik baǵdarlamalardy júzege asyrý metrologııanyń kómeginsiz múmkin emes. О́ıtkeni ólshemder ǵylymı aqparat kózi retinde ǵana emes, materıaldyq resýrstarda, ishki jáne syrtqy saýdada, ónimniń sapasyn, eńbek qaýipsizdigin jáne tehnologııalardy qamtamasyz etýde qoldanylady. Sondyqtan Indýstrııa jáne ınfraqurylymdyq damý mınıstrliginiń Tehnıkalyq retteý jáne metrologııa komıteti metrologııa salasyndaǵy ózekti máselelerdi talqylaý men sheshýdiń joldaryn qarastyrý maqsatynda jyl saıyn elimizdegi metrologterdiń basyn qosyp keledi. Sondaı-aq jas mamandardy yntalandyrýǵa arnalǵan «Úzdik jas metrolog» jáne otandyq óndirýshilerdiń básekege qabilettiligin arttyrýǵa baǵyttalǵan «Úzdik ólsheý quraly» baıqaýy ótip keledi.
«Qazaqstan metrologııa ınstıtýty» RMK uıymdastyrǵan bul jolǵy jıynǵa jınalǵan jastardyń qatary kóp boldy. «Qazaqstan metrologııa ınstıtýty» RMK bas dırektory Toqtabek Toqanov semınardyń L.N.Gýmılev atyndaǵy Eýrazııa ulttyq ýnıversıtetindegi stýdentterdiń qatysýymen ótip jatqanyna erekshe mańyz berdi. «Búgingi meıramnyń osy ýnıversıtette uıymdastyrylýynda mán bar. Biz burynnan JOO túlekterimen tyǵyz baılanysta bolyp, olardy jumysqa ornalastyryp, metrologııa mamandyǵyn keńeıtýge atsalysyp kelemiz. Bıylǵy Jastar jylynyń jarııalanýy bul jumysymyzdy eseleı tústi. Iаǵnı búgin osy salada bilim alyp jatqan jastarmen júzdesýge múmkindik týyp otyr. Bizdiń ınstıtýt tek qana qatysýshy emes, jas metrologterdiń biliktiligin arttyrýǵa, stýdentterdiń tájirıbeden ótýine jol ashyp keledi. Sondyqtan da stýdentter men magıstranttar jyl saıyn ótetin «Úzdik jas metrolog» baıqaýyna qatysady», degen T.Toqanov elimizdegi birden-bir metrologııa salasynda qyzmet etetin mekemeniń múmkindikterimen, jetistikterimen tanystyrdy.
«EUÝ-de metrologııa mamandyǵy boıynsha bilim berý 2010 jyly bastaldy. 2017 jyly «Standarttaý, metrologııa jáne sertıfıkattaý» mamandyǵy «Standarttaý jáne sertıfıkattaý», «Metrologııa» bolyp jeke-jeke mamandyq retinde túlekter qabyldady. Kafedrada tehnıka ǵylymdarynyń doktorlary, kandıdattary men magıstranttary bar. Sońǵy jyldary arnaıy shaqyrylǵan sheteldik professorlar da sabaq berip keledi. Stýdentterimiz «Úzdik jas metrolog» baıqaýynda talaı ret top jaryp shyqty», dedi semınarda sóz alǵan Standarttaý jáne sertıfıkattaý kafedrasynyń meńgerýshisi, professor Baqytgúl Baıhojaeva. Alaıda bakalavrıat túlekteriniń biliktiligin arttyrýda atqarylar jumystyń kóp ekenine toqtalǵan tehnıka ǵylymdarynyń doktory B.Baıhojaeva tájirıbege baǵyttalǵan pánderdi engizýdiń mańyzyn atap ótti.
Semınar sońynda «Úzdik jas metrolog – 2019» jáne «Úzdik ólsheý quraly – 2019» baıqaýynyń jeńimpazdary marapattaldy.
Maıgúl SULTAN,
«Egemen Qazaqstan»
