35 jatyn orynǵa laıyqtalǵan medısınalyq nysanǵa tolyqtaı zamanaýı qurylǵylar qoıylǵan. Jylyna 5 myńdaı naýqasty qabyldaýǵa qaýqarly. Klınıkanyń jumysymen tanysqan Parlament Májilisiniń depýtattary Sergeı Zvolskıı, Quralaı Kareken, Káribaı Musyrman, Artýr Platonovqa osyndaı málimetter usynylyp, endi shetelge shyqpaı-aq eýropalyq deńgeıde jumys isteıtin joǵary mamandandyrylǵan oftalmologııalyq dıagnostıkalyq keshen jaıly basqa da derekter kóldeneń tartyldy. Máselen, qant dıabeti bar adamdardyń kóz aýrýlary lazer arqyly tez-aq anyqtalady. Sol sııaqty kózdiń tor qabyǵyn, kórý júıkesi dimkástigin jedel emdeý joldary da qarastyrylǵan.
– Táýlik boıy emdeý, kúndizgi stasıonar, jedel járdem qyzmeti, ota, lazerlik ota, dıagnostıka qyzmetteriniń bir jerde bolýy jaǵynan biregeı ortalyq elimizdiń ózge óńirlerinde joq. Az qamtylǵan jandar úshin otanyń tegin jasalatyny áleýmettik zor kómek ekenin atap ótkim keledi. Mekemeniń óte jaqsy jabdyqtalǵany, emdelýshiler úshin barlyq jaǵdaıdyń týdyrylǵany sapaly em-dom alýdyń tamasha múmkindikteri sanalady, – dedi ujymmen kezdesý kezinde A.Platonov.
Ortalyqtyń meńgerýshisi Janna Lahına jarty mıllıard teńgege boı kótergen mekemede qyzmetter táýlik boıy kórsetiletinin, aqyly negizde de júrgiziletinin, kóp otalar memlekettik tapsyrys arqyly tegin beriletinin, bul maqsat úshin 340 mıllıon teńge bólingenin jetkizdi. Aldaǵy ýaqytta munda balalar oftalmologııa bólimshesin iske qosý belgilengen. Jeke ınvestordyń qarjysyna turǵyzylǵan keshen keıin memlekettiń menshigine ótedi.
