Oblys ákiminiń orynbasary Ásem Bekqyzy turǵyndardyń ótinishterin nazarǵa alyp, halyqpen tikeleı sóılesip, olarǵa qyzmet kórsetilý deńgeıi qandaı, mine sol máselege basty nazar aýdardy. Semeıdegi Jumyspen qamtý ortalyǵyna kúnine 60 adam ótinish jasaıdy eken. Olardy tez arada qabyldap jiberý úshin Ortalyqqa mamandarynyń qataryn arttyrý qajettigi de aıtyldy. Sebebi halyq tosyp, kezekte turyp qalmaýy kerek. Semeıde AÁK kómekke júginetinderdiń qatary kóp bolǵandyqtan qujattarmen jumys isteıtin mamandar egerde jetpeı jatsa, basqa salalardan da mamandar qosymsha tartylýy múmkin.
- Ataýly áleýmettik kómek máselesine kelsek, ony taǵaıyndaýdyń jańa tártibi bar, - dedi halyqpen kezdesý barysynda Ásem Núsúpova keńinen túsindirip, - Qazaqstanda 2019 jyldyń sáýir aıynyń 1-inen bastap AÁK taǵaıyndaý adam basyna shaqqanda, kúnkóris deńgeıine oraı 50 paıyzdan 70 paıyzǵa ózgerip otyr, bul degenimiz 14 949-dan 20789 teńgege deıin ósken degen sóz. Eger otbasynyń árbir múshesine shaqqanda ortasha tabys 70 paıyzdyń mólsherinen aspasa, onda januıadaǵy ár balaǵa 20 789 teńgeden tólenedi.
Joǵaryda aıtylǵandaı, Semeıdegi Jumyspen qamtý ortalyǵyna jyl basynan 3 978 adam ótinish jasasa, onyń 1930-ynyń ótinishi qabyldanǵan. 1829 otbasyna ataýly áleýmettik kómek taǵaıyndalǵan. Barlyq tólem 261, 7 mln teńgeni qurap otyr. Budan keıin Ásem Núsúpova qaladaǵy oblystyq kámelettik jasqa tolmaǵandar isteri jáne olardyń quqyqtaryn qorǵaý jónindegi komıssııa otyrysyna qatysyp, birqatar mańyzdy máseleni sheshti. Osydan biraz buryn oblys ákimi Danıal Ahmetov Jańashúlbi balalar úıiniń negizinde alǵashqy Ortalyqtyń ashylýy týraly qaýlyǵa qol qoıǵan edi. Bastysy balalar úılerin ońtaılandyryp, ata-ana qaraýynsyz qalǵan balalarmen jumys jasaý deńgeıin jańa úlgige kóshirý qajet. Jasalyp jatqan jumystar nátıjesinde 2009 jyldan beri Shyǵys aımaqta jetim jáne ata-ana qaraýynsyz qalǵan bala sany 4417-den 2735-ke deıin azaıǵan. On bir balalar úıi jabyldy. Osy balalar úıiniń teń jartysy erekshe qajettiligi bar balalarǵa arnalǵan mektep-ınternattar retide qaıta ashylyp, jumysyn jalǵastyrdy. Qazirgi ýaqytta 800 bala Balalar úıinde, al 1914 bala asyrap alǵan otbasylarda tárbıe alýda. «Jetim kórseń jebeı júr» degen qazaq halqy, aldaǵy ýaqytta áleýmettik jetimdikti boldyrmaý úshin oblystyq ákimshilik pen Semeıdegi «Ana úıi» qoǵamdyq qory jáne Bala asyrap alý jónindegi ulttyq agenttik birigip jumys isteıtin bolady.
Jıyn barysynda Semeı qalalyq bilim bóliminiń basshysy Natalııa Fesenko qaladaǵy bala tárbıesi, jazǵy demalysy týraly baıandama jasady. Jáne qaladaǵy «Januıa ortalyǵy» qoǵamdyq qorynyń jumysy týraly da aıtylyp, olardyń atqaryp jatqan isteri sarapqa salyndy.
Raýshan NUǴMANBEKOVA,
«Egemen Qazaqstan»
SEMEI
