Elbasynyń bastamasyna ún qosqan Qyzylorda oblysynyń ákimi Qyrymbek Kósherbaev aımaqta joq mamandyqtarǵa shetelderden oqytýdy 2014 jyldan bastap ketken edi.
Bıyl Qyzylordada Nazarbaev zııatkerlik mektebiniń bazasynda álemniń úzdik joǵary oqý oryndaryna túsýge daıyndaıtyn ortalyq ashý josparlanyp otyr. Bul týraly oblys ákimi Qyrymbek Kósherbaev daryndy túlektermen kezdesý barysynda aıtty.
Kezdesýge respýblıkalyq jáne halyqaralyq baıqaýlardyń, olımpıadalardyń 55 qatysýshysy shaqyrylǵan edi. Olar bıyl 58 júlde, atap aıtqanda, 15 altyn, 13 kúmis jáne 30 qola medal alǵan bolatyn.
Kezdesýde oblys basshysy jastarmen aımaqtyń damýy týraly suhbattasyp, olardyń suraqtaryna jaýap berdi.
- Ekinshi jyl qatarynan bizdiń mektep túlekteriniń 97% joǵary oqý oryndary men kolledjderge túsedi. Endi biz kem degende oblystyq mektep bitirýshileriniń 50% joǵary oqý oryndaryna, onyń ishinde Qazaqstandaǵy oqý oryndary ǵana emes, sheteldik ýnıversıtetterge de oqýǵa túsýin kózdep otyrmyz. Bizdiń endigi maqsatymyz – aımaq jastarynyń Garvard, Iel jáne Massachýsets ýnıversıtetterinde bilim alýyna jaǵdaı jasaý. Sondaı-aq, talantty jastarǵa kásipkerlik, dızaın, kommýnıkasııa sııaqty salalarda jańa tehnologııalardy engizetin jáne qoldanatyn Reseıdiń «Kvantorıým», «Sırıýs» sekildi iri ortalyqtardyń tájirıbesin meńgertý,-dedi aımaq basshysy.
Osy maqsatta qyzylordalyq oqýshylardy «Bolashaq» baǵdarlamasynyń túlekteri qurǵan elordalyq «Astana Garden School» jeke menshik mektebinde oqytýdy uıymdastyrý jáne Nazarbaev zııatkerlik mektebiniń bazasynda oqýshylardy shet memlekettegi irgeli ýnıversıtterge túsýge daıyndaıtyn arnaıy ortalyq ashý josparlanýda. Bul tájirıbe 2016 jyldan bastap Elordada júzege asyrylyp jatyr.
