Jaqynda oblys ákiminiń, memlekettik organ basshylarynyń, óńirdiń ónerkásip kásiporyndary men uıymdary ókilderiniń qatysýymen ótken májiliste jas mamandardy jumysqa ornalastyrý máselesi talqylandy.
Májilisti ashqan oblys ákimi Q.Kósherbaev: «О́zderińiz bilesizder, Biz 2014 jyldan bastap mektep túlekterin maqsatty túrde úzdik otandyq jáne reseılik joǵary oqý oryndary men kolledjderge jiberip kelemiz. Byltyr alǵashqy 74 jas maman dıplomdaryn alyp, elge oraldy, qyzmetterin bastady. Bıyl taǵy 177 jas maman oqýyn bitiredi. Qajetti mamandyqtardy, atap aıtqanda metallýrg, tehnolog, hımık, energetık, jer qatynastary jáne taǵy basqa mamandyqtardy ıgergen bul ınjener mamandar aldaǵy ýaqytta elimizdiń, óńirdiń odan ári ósip-órkendeýine óz úlesterin qosatyn bolady. Sondyqtan, jyl saıyn bitirýshi jas mamandardyń jumyspen qamtylýy barshamyzǵa asa mańyzdy ári jaýapty is», dedi.
Jastar saıasaty jónindegi basqarma basshysy Qýanysh Januzaqov bıyl 117 stýdenttiń 53 túlegi «MBjQI» ulttyq zertteý tehnologııalyq ýnıversıtetin, 41 túlegi K.A.Tımırıazev atyndaǵy Reseı memlekettik agrarlyq ýnıversıtetin, 23 túlegi Sankt-Peterbýrg qalasyndaǵy Tehnologııa jáne energetıka joǵary mektebin bitiretindigi týraly aıtty. Olar «Nanotehnologııa jáne mıkrosıstemalyq tehnıka», «Metallýrgııa», «Tehnologııalyq mashınalar men jabdyqtar», «Elektr energetıkasy jáne elektrotehnıka», «Agroınjenerııa» jáne taǵy basqa 22 mamandyq boıynsha bilim alǵan. Olardyń 50 magıstratýrada oqýyn jalǵastyrýdy josparlap otyrsa, 67 túlek elge oralmaq. Osyǵan oraı, «Bıyl óńirde agroónerkásip kesheni salasynda 76 joba iske asyrylýda. Aımaqta iske qosylýy josparlanǵan 4 joba boıynsha 400-den asa adamdy jumyspen qamtý josparlanǵan. Jas mamandar osy jobalar jáne basqa da iri kásiporyndar men mekemelerge jumyspen qamtylýy tıis», dedi oblys ákimi.
Májilis qorytyndysy boıynsha oblys ákimi óziniń orynbasarlaryna árbir túlektiń jumysqa ornalasýyna jeke jaýapty ekendigin eskertti.
Qyzylorda oblysy
