Senat Tóraǵasy tamaqtaný akademııasynda bolǵan kezde eńbek ujymymen kezdesip, tamaq ónimderiniń sapasy men qaýipsizdigin baqylaý zerthanalarymen, sút ónimderin óndirý tehnologııasymen tanysty.
Darıǵa Nursultanqyzy tamaqtaný akademııasyndaǵy halyqqa arnalǵan ekologııalyq taza ónim jasaý jáne onyń áleýmettik baǵdary týraly aıta kelip, osyndaǵy zertteý jumysynyń mańyzdylyǵyn atap ótti.
«Eń aldymen organıkalyq ónimder kishkentaı balalary bar otbasylarǵa qoljetimdi bolýy kerek. Bizde bıe sútinen jasalatyn balalar taǵamdarynyń óz jelisi bar. Onyń quramynda qant joq. Ondaı ónimdi óz elinde tutyný – búkil álem dıetologtarynyń armany», dedi D.Nazarbaeva.
Senat Tóraǵasy bıe sútiniń paıdaly jaqtary týraly aıta kelip, Akademııa ónimderiniń sapasy joǵary ekenin atap ótti: «Olar óte jańa ári taza ónim daıyndaıdy. Jaramdylyq merzimi bir aı ne jyl emes, 3-den 5 táýlik aralyǵynda bolýy ónimde balalar men eresek adamnyń densaýlyǵyna zııan keltiretin jasandy eshteńe de, hımııa joq ekenin kórsetedi».
Tóraǵa Qazaqstanda balalar taǵamdarynyń óndirisin ulǵaıtý qajettigi týraly aıta kelip: «Mundaı zaýyttardyń ár óńirde bolǵany jáne tutynýshyǵa jaqyn bolýy óte mańyzdy. Osyndaı ónim óndirýshilerge kómektesý kerek. Bul máselege basa nazar aýdarylǵany jón», dep atap ótti.
Qazaq taǵamtaný akademııasynyń prezıdenti Tóregeldi Sharmanov óz kezeginde balalar sút taǵamdaryn bıe sútiniń negizinde óndirý alǵash ret qolǵa alynyp otyrǵanyn aıtty.
«Qazir halyqqa ana sútin almastyratyn allergensiz ónim qajet. Ana sútine eń uqsas ári tolyqqandy ónim – bıe súti. Mysaly, kishkentaıynan sútke zárý balalarǵa bıe sútin alańsyz berip, odan paıda bolmasa zııan shekpeıtinin aıtyp kelemiz. Bul qýatty ónim, sebebi sút konservileıtin zattar qosylmaǵan, qaıta qalpyna keltirilmegen tabıǵı dúnıe bolyp tabylady. Onda dárýmender, mıkroelementter, syrtqy aqýyz bar. Osynyń bári balalardyń jaqsy ósýi men damýyna yqpal etedi. Bıe sútiniń negizinde balalar taǵamyn óndirý – bul bizdiń ǵylymı jetistigimiz», - dedi T.Sharmanov.
Akademıktiń aıtýynsha, qazir zaýyt bıe súti negizinde erekshe shokolad shyǵara bastady. Qantsyz, ashytqysyz ári allergııa boldyrmaıdy.
Elimizdiń Tuńǵysh Prezıdenti, Elbasy N.Á.Nazarbaev 2010 jylǵy jeltoqan aıynda Qazaq tamaqtaný akademııasynyń emdik-profılaktıkalyq sút taǵamdaryn shyǵarý jónindegi «Amıran» zaýytyn iske qosqan bolatyn. Akademııa ótken kezeńde zaýytta joǵary sapaly tabıǵı ónimniń ondaǵan túrin jasap shyǵardy. Búgingi tańda kásiporyn Qazaqstanda joǵary sapaly tabıǵı sútten jasalǵan balalar sút taǵamdaryn shyǵaratyn alǵashqy jáne jalǵyz kásiporyn bolyp otyr. Statıstıkalyq derekter boıynsha, ótken jyly balalar taǵamdary tek EAEO elderinen 43 mıllıon AQSh dollarynan astam somaǵa ımporttalyp, 20103,6 tonnany quraǵan bolatyn.
