Qaýipti dertpen kúres aldyn alǵanda ǵana nátıje beredi
Juma, 29 naýryz 2013 0:41
Almatyda Respýblıka saraıy aldyndaǵy alańqaıda qala turǵyndary úshin Dúnıejúzilik týberkýlezge qarsy kúres kúnine arnalǵan promo-aksııa ótti. Is-shara sheńberinde turǵyndar tegin flıýorografııalyq tekserýden ótip, ftızıatr mamandardan keńes aldy. Jınalǵandarǵa týberkýlez dertine qatysty saýalnamalar taratyldy. Júldegerlerge syılyqtar tapsyrylyp, sońy konserttik baǵdarlamaǵa ulasty.
Juma, 29 naýryz 2013 0:41
Almatyda Respýblıka saraıy aldyndaǵy alańqaıda qala turǵyndary úshin Dúnıejúzilik týberkýlezge qarsy kúres kúnine arnalǵan promo-aksııa ótti. Is-shara sheńberinde turǵyndar tegin flıýorografııalyq tekserýden ótip, ftızıatr mamandardan keńes aldy. Jınalǵandarǵa týberkýlez dertine qatysty saýalnamalar taratyldy. Júldegerlerge syılyqtar tapsyrylyp, sońy konserttik baǵdarlamaǵa ulasty.
Dúnıejúzilik týberkýlezge qarsy kúres kúnine oraı ótkizilgen bıylǵy aılyq aıasyndaǵy bul is-sharanyń barysynda halyqpen etene jaqyn aralasyp, qaýipti keseldiń kesapaty jaıly túsindirý, aldyn alý jumystary júrgizildi. Taǵy bir aıta keterligi, týberkýlezge qarsy mekemeler ókilderinen basqa da emhanalar men mektep ujymdary, óner adamdary, týberkýlezge qarsy shıpajaılar men Salamatty ómir saltyn qalyptastyrý problemalary ortalyǵynyń, sonymen qatar, halyqaralyq uıymdar men BAQ ókilderiniń de kúsh biriktirýge umtylysynyń kýási boldyq.
Keń kólemdi shara ótpes buryn tańerteńgilik Týberkýlez problemalary ulttyq ortalyǵynda úkimettik emes halyqaralyq uıymdardyń qoldaýymen jýrnalısterge arnalǵan baspasóz máslıhaty uıymdastyrylyp, onda Qazaqstandaǵy týberkýlezdiń epıdemıologııalyq jaǵdaıyn memlekettik, úkimettik emes halyqaralyq jáne qoǵamdyq uıymdar arasyndaǵy qarym-qatynasty kúsheıtý arqyly turaqtandyrý, t.b. birqatar máseleler sóz boldy.
Al alańqaıǵa taqyryptyq materıaldar jazylǵan bılbordtar, turǵyndarǵa arnalǵan jadynama, týberkýlez aýrýynyń aldyn alý týraly aqparattar, plakattar qoıyldy. Jıyndy Týberkýlez problemalary ulttyq ortalyǵynyń dırektory, professor T.Ábildaev ashyp, kóktem shyǵa kúsh alatyn koh taıaqshasynyń adam aǵzasyna keltiretin zııany, aýrýdy juqtyrýdyń amaldary, sondaı-aq, elimizde týberkýlezden syrqattaný deńgeıiniń tómendep otyrǵanyna toqtala kele, búginde qurt aýrýynyń aldyn alý jáne emdeý 2011-2015 jyldarǵa arnalǵan «Salamatty Qazaqstan» densaýlyq saqtaý salasyn damytýdyń memlekettik baǵdarlamasynyń basym baǵyttarynyń biri bolyp tabylatynyn jetkizdi.
– Eger biz osydan bes jyl buryn osy dert boıynsha kóshbasshy elderdiń qatarynda tursaq, búgingi tańda elimizde qarqyndy júrgizilip jatqan jumystardyń nátıjesinde, bul kórsetkishti tómendetýge qol jetkizdik. Týberkýlez tek juqpaly aýrý ǵana emes, áleýmettik dert. Osyǵan oraı syrqattardy áleýmettik qoldaý máseleleri de qolǵa alynýda. Máselen, 2011 jyly 257 mln. teńgege áleýmettik kómek kórsetilse, 2012 jyly bul soma 335 mln.-ǵa jetti, – dedi Tileýhan Ábildaev.
Aksııany uıymdastyrýshylardyń biri Almaty qalalyq týberkýlezge qarsy kúres dıspanseri ujymy ákelgen Flıýkar rentgen-flıýorografııalyq jyljymaly sandyq KRF-112 keshenine qala turǵyndary kelip, túsip jatty. «Jastar densaýlyqtaryna sonshalyqty mán bermeı júre beredi ǵoı. Balam eki aıdan beri jótelip júrgen. Stýdentterdiń emhanasyna bar desem, kezek kóp dep túse almaı kelipti. Osyndaı aksııa júrip jatqanyn estip, balamdy ertip ákelip, rentgenge túsirdim ári arnaıy mamanǵa kórsetip aldym. Rentgen qorytyndysy bir-eki án tyńdaǵansha daıyn boldy. Balam qurt aýrýynan taza bolyp shyǵyp, kóńilim ornyna túsip ketip baramyn, dedi ózin zeınetkermin dep tanystyrǵan Gúljaýǵash Altynbekova apaı.
Sondaı-aq, atalmysh is-shara aıasynda Almaty qalasy boıynsha dárigerler arasynda ótken «Týberkýlez týraly eń úzdik bilimge ıe» atty baıqaýdyń jeńimpazdaryn quttyqtap, baǵaly syılyqtar tapsyrdy.
Gúlzeınep SÁDIRQYZY,
«Egemen Qazaqstan».
