Odan keıingi oryndy Google brendi ıelendi – 167 mıllıard dollar. 125,3 mıllıardqa baǵalanǵan Microsoft úshtikti qorytyndylap turca, TOP-10-nyń sońyna McDonalds ornalasty. Alǵashqy 5 orynnyń beseýi de IT kompanııa ekenin aıta keteıik.
Apple-diń negizgi tabys ákelip jatqan ónimi iPhone ekeni túsinikti. Degenmen, sońǵy birneshe toqsanda onyń satylym kólemi aıtarlyqtaı tómendep ketipti. Ásirese, qytaılyq arzan smartfondar oǵan basty básekeleske aınala bastaǵany baıqalady. Sonyń saldarynan sońǵy 3 aıda amerıkalyq tehnogıganttyń negizgi óniminiń satylym kólemi 17 paıyzǵa tómendep ketken. Alaıda, App Store, Apple Pay, iTunes, bultty servıs sııaqty qyzmet túrleriniń satylymy qarqyn alýyna baılanysty kompanııanyń jalpy tabysy sońǵy toqsanda 5 paıyzǵa ósti.
Brend baǵasy byltyrǵydan 27 paıyzǵa kóterilgen Google osy qarqynynan taımasa Apple-di ókshelep qalýy ábden múmkin deıdi mamandar. Tórt-aq jyl buryn ol Apple-den eki ese arzanǵa baǵalanǵan eken.
Alǵashqy bestiktegi 5 IT kompanııanyń ishinde baǵasy quldyraǵany Facebook qana. Ony belsendi qoldanatyndardyń sany 2,4 mıllıard adamnan asyp jyǵylǵanyna qaramastan, byltyr derbes derekterdiń saqtalýyna, beıtaraptylyq saıasatyna, jalǵan jańalyqtarǵa qatysty týyndaǵan daý kompanııanyń brendine aıtarlyqtaı nuqsan keltiripti.
IT-den bólek naryqtaǵy eń qymbat brend ataǵyn Coca-Cola kezekti márte qorǵap qaldy. Byltyrǵydan 3 paıyzǵa qymbattap, 59,2 mıllıardqa baǵalanǵan kompanııa altynshy orynǵa jaıǵasty.
Forbes-tiń habarlaýynsha, álemdegi eń qymbat 100 brendtiń jalpy quny 2,33 trıllıon dollardan asyp túsedi. Bul kompanııalardyń 56-sy AQSh-qa tıesili ekenin aıta ketý kerek. 11 kompanııa – Germanııaǵa, 7 kompanııa – Fransııaǵa, 6 kompanııa – Japonııaǵa tıesili.
