Úshinshi megapolıstegi «Túrkistan» saraıynda ótken kezdesýge respýblıkalyq qoǵamdyq shtabtyń shtab jetekshisi, «Nur Otan» partııasy Tóraǵasynyń birinshi orynbasary M.Áshimbaev bastaǵan respýblıkalyq qoǵamdyq shtab músheleri, Shymkent qalasynyń aktıvi, ákimdik ókilderi, Shymkent qalasy máslıhatynyń depýtattary, zııaly qaýym ókilderi, mádenıet salasynyń qyzmetkerleri, ustazdar, stýdentter, BAQ ókilderi, jalpy sany 1500-ge jýyq adam qatysty.
Aldymen baıandama jasaǵan qoǵamdyq shtabtyń tóraǵasy Máýlen Saǵathanuly Q.Toqaevty úmitker retinde Elbasynyń ózi usynǵanyn aıtty. Spıker Qasym-Jomart Kemelulynyń Qazaqstan men sheteldegi eń mańyzdy degen laýazymdardy atqarǵanyn aıtyp, eldiń ekonomıkalyq jáne áleýmettik turǵyda damýyna sińirgen úlesine toqtaldy.
«Táýelsizdik jyldarynda Shymkenttiń damý qarqyny joǵary boldy. Endi araǵa birneshe jyl salyp, bul shahar óziniń damyǵan ınfraqurylymymen, ómir súrýge qolaıly jaǵdaıymen, tek Qazaqstannyń ǵana emes, búkil Orta Azııa men TMD aımaǵyndaǵy eń iri qalaǵa aınalady dep senemiz. Ol úshin kandıdatymyzdyń baǵdarlamasynda aıtylǵandaı bir orynda turmaı órleý qajet. Al órleý aýyldy jerlerdi taza aýyz sýmen qamtamasyz etý, joldardy jóndeý, úsh aýysymdy mektepterdi zamanaýı bilim oshaqtarymen aýystyrý, apatty jaǵdaıdaǵy mektepterdi jabý sııaqty naqty isterden bastalady. Munyń barlyǵy Q.Toqaevtyń baǵdarlamasynda naqty kórsetilgen» dedi Shtab jetekshisi Máýlen Áshimbaev.
Máýlen Saǵathanuly QR Prezıdenttigine kandıdat Q.Toqaevtyń saılaýaldy baǵdarlamasynyń úsh negizgi ustanymy týraly baıandady. Sondaı-aq kezdesýde Májilis depýtaty, Halyq qaharmany B.Ertaev, telejúrgizýshi D. Nurjigit, belgili qalamger N. Orazalın, «Egemen Qazaqstan» AQ prezıdenti D. Qydyráli, qoǵam qaıratkerleri Q. Sultanov pen Z. Turysbekov, «Dostyq» qaýymdastyǵynyń tóraǵasy I. Hakımjanov sóz alyp, kandıdattyń baǵdarlamasyndaǵy negizgi basymdyqtar men halyqtyń áleýmettik jaǵdaıyn jaqsartýǵa baǵyttalǵan naqty ustanymdarǵa nazar aýdardy.
Sondaı-aq, Respýblıkalyq qoǵamdyq shtab músheleri Shymkent qalasynyń jastarymen kezdesti. «Kórme» ortalyǵynda ótken Respýblıkalyq shtabtyń belsendi jastarynan quralǵan «Team Qazaqstan» forýmyna 3 myńnan asa jas qatysty.
«Jastar – elimizdiń bolashaǵy. Jas býyn memlekettiń damýynda sheshýshi ról atqarady. Olarǵa barlyq jaǵdaı jasalýy kerek. Bizdiń jas azamattarymyz – maqsatshyl, eńbekqor, bastamashyl. Sondyqtan da Qazaqstanymyzdyń bolashaǵy zor!» - delingen Qasym-Jomart Toqaevtyń baǵdarlamasynda. Kandıdatymyz sizderge úlken senim artyp otyr. Barlyqtaryńyzdy 9 maýsymda saılaý ýchaskesine kelip, el bolashaǵy úshin daýys berýge shaqyramyn!» dedi Respýblıkalyq shtab jetekshisi M.Áshimbaev.
Forýmǵa
jınalǵan jastardyń aldynda sóz alyp, eldiń erteńine beıjaı qaramaı, saılaýǵa
shaqyrǵandardyń qatarynda Qasym-Jomart Toqaevtyń jaqtastary Mádına Sádýaqasova,
Aıqyn Tólepbergen, «Alashuly» tobynyń ánshileri, belgili telejýrnalıst, blogerler Ashat
Sadyrbaı, Erǵazy Ázimhanuly jáne tanymal aktrısa Quralaı Anarbekova,
telejúrgizýshi Dáýlet Bıjanov sııaqty belsendi jastar boldy.
Shymkenttik jastar forýmda aıtylǵan bastamalardy qoldap, óz taraptarynan
belsendilik tanytty.
Munan soń jetekshi partııa Tóraǵasynyń birinshi orynbasary Máýlen Saǵathanuly bastaǵan Respýblıkalyq qoǵamdyq shtab músheleri Shymkenttegi iri óndiris oryndarynda bolyp, ondaǵy saılaýshylarmen kezdesti. Ári, 9 maýsymdaǵy saıası naýqanǵa belsene qatysyp, kandıdat Qasym-Jomart Toqaevqa daýys berýge shaqyrdy.
