– Rahat myrza, «Nur-Sultan Ethno Fest» merekesi qaıda ótedi jáne kórermen nazaryna qandaı shara usynylmaq?
– «Nur-Sultan Ethno Fest» etnofestıvali elordadaǵy «Han Shatyr» kesheni mańynda aldaǵy 31 mamyr men 2 maýsym aralyǵynda ótedi. Tuńǵysh ret uıymdastyrylyp otyrǵan bul sharany elordalyqtar men qala qonaqtary tamashalaı alady. Al kórermen nazaryna usynylatyn qyzyqtarǵa toqtalsaq, balalarǵa arnalǵan etnoattraksıonda ulttyq oıyn túrleri ótkizilip, qatysýshylarǵa syılyq úlestiriledi. Ekinshiden, festıval aıasynda jamby atýdan álem chempıonaty jáne dástúrli sadaq atýdan respýblıkalyq týrnır ótpekshi. Budan bólek etnofestıval kórermenderi aýdaryspaq, sadaq atý, arqan tartý, serke kóterý, naıza laqtyrý, asyq atý sııaqty kóptegen ulttyq oıyndar jarysynda baq synap, syılyq alatyn múmkindik qarastyrylǵan. Onyń syrtynda ata-analar balalarymen birge qýyrshaq teatrynyń qoıylymdaryn tamashalap, atpen serýendep, bala kúres, aýdaryspaq, asyq atý, láńgi tebý, qappen sekirý sekildi jarystarǵa qatysa alady.
Arnaıy jasaqtalǵan etnoqalashyqta ulttyq qolóner buıymdaryn saýdalaıtyn oryndar, ulttyq oıyndardan saıys ótetin sporttyq alańdar jáne ulttyq jıhazdarmen jabdyqtalǵan kıiz úıler ornalasady.
– Jamby atýdan ótetin álem chempıonaty týraly keńirek aıtyp ótseńiz.
– Osyǵan deıin elorda tórinde jamby atýdan «Altyn jebe» básekesi ótkizilgen edi. Oǵan Vengrııa, Ońtústik Koreıa, Fınlıandııa, Malaızııa, Túrkııa, Mońǵolııa, Reseı, Rýmynııa, Polsha, t.b. elderdiń mergenderi qatysqan bolatyn. «Altyn jebe» týrnıriniń bas júldesin Mıhaı Kozmeı esimdi rýmynııalyq surmergen eki jyl qatarynan utqany belgili.
Bul retki mergender saıysynda Ońtústik Afrıka, Ońtústik Koreıa, Reseı, Rýmynııa, Túrkııa, Vengrııa jáne t.b. memleketterdiń mergenderi baq synaıdy. Jarysqa qatysýshy árbir elden eki sportshydan, uıymdastyrýshy retinde bizdiń el bes mergenin qosady. Chempıonat «Azııa stıli», «Túrik stıli» jáne «Qazaq stıli» erejeleri boıynsha ótkiziledi.
– Siz atalǵan etnofestıval ulttyq salt-dástúrimizdi ulyqtaýǵa arnalǵan dedińiz, osy jaıly tarqatyp aıtyp berseńiz?
– Etnofestıvaldyń ózegi – ulttyq salt-dástúrdi ulyqtaý desek jańylmaımyz. Joǵaryda aıtyp ótkenimizdeı, arqan tartý, asyq atý, serke kóterý, qappen sekirý sııaqty oıyndardyń syrtynda, atpen jáne jerde turyp naıza laqtyrý saıysynyń eki túri, qamshymen terini qaq bólý sııaqty qamshygerlik óner, ulttyq sadaq atýdan mergendik básekesi, aýdaryspaq pen teńge ilýdiń kópshilikke yńǵaıly jasandy atpen oryndalatyn túri bar.
Ár oıynnyń basy-qasynda tájirıbeli tóreshiler bolady. Eń qyzyǵy, keıbir umytylǵan ulttyq dástúrler osy mereke kezinde jańǵyrtylmaq. Mysaly, qamshygerlik óner, tezge salý, qolqa salý, tyǵyryqqa tireý, arqan órý, qamshy órý, t.b. dúnıeler jurtshylyq nazaryna usynylyp, olardyń shyǵý tarıhy men mán-maǵynalary jaıly etnograf ǵalymdar halyqqa túsindiredi.
Áńgimelesken Beken QAIRATULY,
«Egemen Qazaqstan»
