Arystan Isanjýlov kóptegen respýblıkalyq, oblystyq jarystarda top jaryp, búginde FIDE (ulttyq shahmat federasııalaryn biriktirýshi halyqaralyq sport uıymynyń) sheberi dárejesine jetken álem chempıony. Kezdesý barysynda Arystan elordada naýryzdyń 4-15 kúnderi «Qazaqstan shahmat federasııasynyń» uıymdastyrýymen klassıkalyq shahmattan ótken álem chempıonatynyń komandalyq qyzyqty tartysy jaıly áńgimelep berdi.
Chempıonattyń bas demeýshisi – ERG Eýrazııalyq toby, al týrnırdiń bas seriktesi Samruk Kazyna bolsa, osy sharaǵa 50 noýtbýk, 4 prınter jáne 2 MFÝ usynypty. ERG Eýrazııalyq toby men Samruk Kazyna ótinishi boıynsha joǵaryda atalǵan barlyq jabdyqtar Qazaqstannyń on bir óńirindegi balalar mekemelerine shahmat sportyn damytý úshin tabystalýy qajet eken. Semeıdegi №8 Balalar úıine bólingen tórt noýtbýkty tapsyrý mindeti Arystan Isanjýlovqa tapsyrylǵan.
– Arystan tórt noýtbýkty tapsyrǵanda balalarymyz bir jadyrap qaldy, – dedi dırektordyń tárbıe isi jónindegi orynbasary Rymhan Nurǵalıeva, – halqymyz «Jetim kórseń jebeı júr» dep beker aıtpaǵan. Arystanǵa qarap balalarymyz úlgi alsa nur ústine nur bolar edi.
Raýshan NUǴMANBEK,
«Egemen Qazaqstan»
SEMEI
