Konstıtýsııalyq keńestiń tóraǵasy Q.Mámı jetekshilik etken delegasııa quramyna Keńestiń múshesi V. Malınovskıı, Quqyqtyq qamtamasyz etý jáne halyqaralyq yntymaqtastyq bóliminiń basshy qyzmetkerleri M.Badalıev jáne N. Tasbolatov kirdi.
Is-shara 2016 jyly Qazaqstan men Reseıdiń konstıtýsııalyq ádilet organdary arasynda jasalǵan Yntymaqtastyq týraly memorandým aıasynda Reseı tarapynyń bastamasymen júzege asyryldy.
Sapar barysynda Qazaqstan delegasııasy men Reseı Konstıtýsııalyq sotynyń quramy arasynda pikir jáne aqparat almasyldy.
Sýdıalarmen áńgimelesý barysynda Q.Mámı: «Keıbir ınstıtýsıonaldyq aıyrmashylyqtarǵa qaramastan, biz uqsas maqsattardy kózdeımiz. Bul Konstıtýsııanyń ústemdigin, oǵan zańnama men quqyq qoldaný praktıkasynyń sáıkestigin qamtamasyz etýge, adamnyń quqyqtary men bostandyqtaryn qorǵaýǵa tikeleı qatysty», dedi.
«О́zara is-qımyldyń mundaı formaty bizge júktelgen ókilettikterdi iske asyrý tásilderi men joldaryn, Negizgi Zańnyń jekelegen normalaryn túsindirý jáne konstıtýsııalyq qundylyqtardy qorǵaý praktıkasyn tereńirek zertteýge múmkindik beredi. Bizdiń qarym-qatynastarymyz aldaǵy ýaqytta da jemisti yntymaqtastyq pen alda turǵan kúrdeli mindetterdi sheshý kezinde ózara qoldaý kórsetý rýhynda damı beretinine senimdimin», dep qorytyndylady sózin Q. Mámı.
Konstıtýsııalyq baqylaýdy júzege asyrý sapasy belgili bir shamada osy organdardyń apparattary qamtamasyz etetin aqparattyq-taldamalyq jáne ǵylymı-konsýltatıvtik súıemeldeý deńgeıine de baılanysty. Sondyqtan Qazaqstan Konstıtýsııalyq keńesi apparatynyń qyzmetkerleri Reseı Konstıtýsııalyq soty hatshylyǵy basqarmalarynyń bastyqtarymen kelip túsken ótinishterdi qaraý kezinde osy organdardyń quramdarymen ózara is-qımyl máselelerin talqylady.
Tutastaı alǵanda, sapar Qazaqstan men Reseı Federasııasynyń Konstıtýsııanyń ústemdigin qamtamasyz etý salasyndaǵy yntymaqtastyǵyna jańa serpin berýge jáne eki memlekettiń konstıtýsııalyq damý prosesterine baılanysty kóptegen ózekti máselelerdi sheshý joldaryn tabýǵa múmkindik beredi.
