Konstantın Petrov «Saılaý týraly» Konstıtýsııalyq zańǵa engizilgen ózgerister men tolyqtyrýlardy tanystyrdy.
– Bul jańalyq bıliktiń ókildik organdaryn qalyptastyrýǵa qatysty, – dedi Konstantın Petrov. – Elimizdiń óńirlerindegi máslıhattardyń quramy saılaýshylar daýystarynyń proporsıonaldy úlesine sáıkes saıası partııalar usynǵan tizimder boıynsha qurylady. Al proporsıonaldy júıe Norvegııa, Fınlıandııa, Danııa, Bolgarııa jáne Lıtva sekildi elderdegi saılaý kezinde qoldanylýda.
Bul kúnderi saılaýshylardyń tizimin naqtylaý isi júıelenýde. Elimizde 2020 jyldyń sońyna deıin saılaýshylar tizimi biryńǵaı aqparattyq júıege keltirilmek. Zańnamaǵa engizilgen ózgeristerge sáıkes aýmaqtyq saılaý komıssııalarynyń da quzyreti artýda.
Konstantın Petrov kezekten tys prezıdenttik saılaýdyń ótkizilý tártibine de toqtaldy. Kezekten tys saılaý da zańnamaǵa sáıkes kezekti saılaý sııaqty ótkiziledi, tek onyń merzimin Ortalyq saılaý komıssııasy belgileýge quqyly, deı kelip, ol saılaý komıssııalaryn ashyq jumys isteýge shaqyrdy.
Sonymen qatar oblys ákiminiń apparat basshysy Aǵybaı Ámirın óńirimizdiń saılaýǵa daıyndyǵy týraly baıandady. Bul kúnderi óńirde 543 ýchaskelik saılaý komıssııasy jumys isteýde. Shaǵyn aýyldardy ońtaılandyrýǵa oraı 33 ýchaske qysqartylǵan. Saılaý komıssııasy jumysyna 3567 adam qatysýda. Ár ýchaske materıaldyq-tehnıkalyq turǵydan tolyq qamtylypty.
Sondaı-aq ýchaskege bara almaıtyn azamattardyń konstıtýsııalyq tańdaý jasaýyn qamtamasyz etý úshin kóshpeli jáshikter saılaýshylardyń úılerine jetkizilmek. Múmkindigi shekteýli jandarǵa kómekshiler qarastyrylady. Invataksıler memlekettik tapsyrys negizinde qyzmet kórsete alady.
Oblystyq aýmaqtyq saılaý komıssııasynyń tóraıymy Gúlnár Amanjolovanyń aıtýynsha, óńirdegi barlyq saılaý ýchaskesi pandýstarmen qamtylǵan. Arnaıy kabınalar da jabdyqtalǵan. Al saılaýshylar tizimi saılaý ýchaskelerine berilgen. Jalpy tizim boıynsha 551 myń oblys turǵyny daýys berýge quqyly. Qazir saılaýdyń ár kezeńine baıqaý júrgizetin EQYU-dan uzaq merzimge kelgen eki ókil óńirimizde jumys isteýde.
Pavlodar oblysynda saıası naýqanǵa daıyndyq barysy belsendi júrgizilýde, ár kandıdat úgit-nasıhat jumystaryn jalǵastyryp, aýmaqtyq saılaý komıssııalary ázirlikterin pysyqtaýda.
Sýretti túsirgen Valerıı Býgaev
Pavlodar oblysy
