Reseılik kompanııamen kelisimdi qazaqstandyq «Maker (Meıker)» JShS, «Petropavl aýyr mashına jasaý zaýyty» AQ jáne «Qazenergomash korporasııasy» JShS jasasyp otyr. Indýstrııa jáne ınfraqurylymdyq damý mınıstrliginde ótken sharaǵa mınıstr Roman Sklıar, mınıstrlik ókilderi, Podolsk mashına jasaý zaýytynyń basqarma tóraǵasy Alekseı Rýbsov, qol qoıýshy kásiporyn basshylary qatysty.
̶ Kelisim ıntegrasııalaý úderisin nyǵaıtýǵa úlesin qosatynyna, eki el kásiporyndary arasyndaǵy baılanysty tereńdetýge yqpal etetinine senimdimin. Búgin de kólik qurastyrý kesheni – Qazaqstan ekonomıkasynyń ósim draıverleriniń biri. Yntymaqtastyq ornatý maqsatynda Podolsk mashına jasaý zaýyty mamandarynyń qazaqstandyq kásiporyndarǵa irikteý júrgizgeni úshin alǵys aıtqym keledi, – dedi R.Sklıar óz sózinde.
Mınıstrdiń aıtýynsha, eki el kásiporyndarynyń mundaı tyǵyz yntymaqtastyǵy Podolsk mashına jasaý zaýytynyń halyqaralyq tájirıbesine negizdele otyryp, otandyq jáne sheteldik elektr stansalaryn energetıkalyq jabdyqtarmen qamtamasyz etedi.
Qol qoıylǵan kelisimder eki el kásiporyndaryna generasııalaýdyń, jańǵyrtýdyń jáne jumys istep turǵan nysandardy qaıta jańartýdyń jańa múmkindikterin ashpaq. Sondaı-aq atalǵan kelisim jylý energetıkasy segmentterindegi jabdyqtar men jınaqtaýshy qosalqy bólshekterdi jetkizý, tájirıbe almasý, energetıkalyq jáne ózge de mashına jasaý jabdyqtaryn óndirý, birlesken ǵylymı-zertteý jáne tájirıbelik-konstrýktorlyq jumystardy júrgizýge múmkindik beredi.
