Qutqarýshylardyń aıtýynsha, qala aýmaǵyndaǵy sýburqaqtar men ózen-kólderge shomylýǵa tyıym salynǵan. Mundaı oryndarda kópirler men dambalardan, qaıyqtardan sýǵa súńgimeýge, balalardy qaraýsyz qaldyrmaýdy qatań eskertedi.
Sondaı-aq tótenshelikter «Naýryz» alańynda erikti jastardyń qatysýymen fleshmob uıymdastyryp, qala turǵyndaryna sýda shomylý erejelerin túsindirdi. Jedel qutqarý jasaǵy sý qoımalaryndaǵy negizgi tártip erejeleri jáne sýda bolǵan jaǵdaıda ne isteý qajet ekenin eskertip, alǵashqy kómek kórsetý tártipteri týraly arnaıy kórinis kórsetti.
«Qaıǵyly jaǵdaılardyń negizgi sebebi, sýǵa masaıǵan kúıde túsý, sonymen qatar qaýipti oryndarda shomylý. Salqyndaımyz degen adamdar sýdaǵy qaýipsizdik erejelerin umytyp, jaqyn mańdaǵy sý aıdyndaryna túsýde. Qaýipsizdikke nemquraıly qaramaý kerek», deıdi Tótenshe jaǵdaılar departamentiniń aǵa ofıseri Nurjan Qaragózov.
Negizinde jazataıym oqıǵalardyń basty sebepteri kóbinese baqylanbaıtyn oryndarda shomylý, balyq aýlaý kezinde sýdaǵy qaýipsizdik qaǵıdalaryn saqtamaý, balalardyń sý aıdyndarynyń qasynda eresekterdiń qaraýynsyz qalýynan týyndaýda.
Búginde jalpy qala boıynsha 4 ózen, 4 sý qoımasy, 5 toǵan jáne 22 demalys oryndary (akvasaıabaqtar, saıajaılar jáne t.b.) bar. Alaıda, bıylǵy 4 aıda qala aýmaǵynda sýdaǵy jazataıym oqıǵalar tirkelgen joq, deıdi sala jaýaptylary.
