Atyraý oblysy ekonomıka jáne bıýdjettik josparlaý basqarmasynyń basshysy Aıdar Nuralıevtiń aıtýynsha, MJÁ iske asyrýda problemalar bar. 2017 jyldan beri basqarma 60 jobany taldaǵan, júzege aspaı qalǵan jobalar da bar.
Munaıly aımaqtaǵy 8 jobanyń jeteýi birinshi sanatqa, bireýi ekinshi sanatqa jatady.
Atyraý oblysynyń ákimi Nurlan Noǵaevtyń tóraǵalyǵymen ótken memlekettik – jekemenshik áriptestikti damytý máselesi boıynsha keńeste Aıdar Nuralıev jergilikti ınvestorlardy, aýyl kásipkerlerin keńirek tartý qajet ekenin aıtyp, mysal retinde osyndaı jumys júrip jatqan Qyzylorda oblysyn keltirdi. Taıaý arada basqarma memlekettik qyzmetshilerdi MJÁ tetigine úıretedi.
- Jobalardyń áleýmettik tıimdiligi aıqyn. Máselen, foto-beıne tirkeý jobasyn iske asyrý jolda da, qoǵamdyq jerlerde de azamattardyń qaýipsizdigin kúsheıtedi,-dep atap ótti aımaq basshysy.- Qazir osy joba boıynsha bizde 759 kamera iske qosylǵan. Taǵy 774 dana kamera ornatý josparlanyp otyr, sondaı-aq, 51 jol qıylysy men 153 jol ýchaskesi jol qozǵalysy erejeleriniń buzylýyn foto-beıne tirkeý kameralarymen qamtamasyz etiledi.
Kóshelerdi jaryqtandyrý jobasy da mańyzdy. Búginde oblys ortalyǵynyń júzdegen kósheleri jaryqtandyrylǵan. Energııa únemdeý tehnologııalary qoldanylǵandyqtan, olardy paıdalanýda qazyna qarajaty únemdeledi.
- Osy jumysty jalǵastyrý, sonyń ishinde, úshinshi sanat boıynsha iske asatyn jobalardy kóbeıtý qajet. Iаǵnı, kásipkerler ózderi salǵan nysandar sanyn ulǵaıtyp, olardy memlekettik tapsyryspen qamtamasyz etý kerek,-dedi Nurlan Noǵaev.
О́ńirlik kommýnıkasııalar qyzmetiniń habarlaýynsha, densaýlyq saqtaý basqarmasy da MJÁ arqyly úsh joba júzege asyrǵan, olar- eki medısınalyq mekemeni senimdi basqarýǵa berý jáne ókpe týberkýlezin erte dıagnostıkalaý boıynsha is-sharalar kesheni. Taǵy úsh joba iske asyrylý kezeńinde. Al, 2023 jylǵa deıin 13,1 mlrd teńgege onshaqty jobany iske asyrý usynylyp otyr, olardyń qatarynda dárigerlik ambýlatorııalar, aýrýhanalar, jas mamandarǵa arnalǵan jataqhana, medısına kolledji sport kesheniniń qurylysy bar.
