Úshemderdiń ata-analary me dárigerler «kóz» ben «sózden» saqtanǵan da bolar 1-shi mamyrda dúnıege kelgen úshem týraly aqparatty jarııa etpepti. Oblystyq №3 perınataldyq ortalyqta merziminen erte bosanǵan 27 jastaǵy Dınara Narhanova úsh uldy ómirge ákeldi. Nárestelerdiń salmaǵy 1 820 gr, 1800 gr, 1730 gr bolǵan. Alǵashqy kezde sábılerdiń jaǵdaıy aýyr bolǵan soń dárigerler jasandy tynystaný apparatyna qosyp, bir aı kóleminde densaýlyqtaryna erekshe kútim jasaǵan. Qazir jaǵdaılary jaqsaryp, salmaqtary eki keliden asqan. Jasandy uryqtandyrý jolymen júkti bolǵan kelinshek balalarynyń esimin Ikram, Islam jáne Imran qoıypty. Buǵan deıin bir qyzy bar otbasynyń perzentteri osylaısha tórteýge jetip otyr.
Al, ekinshi úshemniń anasy Saıera Týklıeva 29 jasta. Birlik aýylynda turatyn kelinshek 27 mamyr kúni bosanǵan. Kesar tiligi arqyly eki qyz ben bir uldy ómirge ákelgen jas ananyń úıinde taǵy úsh perzenti bar. Náresteleri de aıy - kúnine tolyp, óz úılerine jiberildi. «Úshemderge júkti ekenimdi besinshi aptada bildim. Úı-ishimizben qýandyq. Bastapqy júktilik kezinde biraz qınalǵan kezderim boldy. Biraq erekshe kútim jasap, dárigerlerdiń aıtqanyn oryndadym. Perzentterimdi aman-esen bosanyp aldym. Dárigerlerge alǵys aıtqym keledi, bizge jaqsy em-dom jasap, jaqsy qarady. Esimderin Fatıma, Ismaıl, Zýhra dep qoıdyq. Osylaısha ómirge úsh perzent ákelip, batyr ana atandym. Alla taǵalama osyndaı perzentter bergeni úshin rızamyn»,- deıdi Saıera Týklıeva.
Úılerine shyǵarylarda qos ana men nárestelerge oblystyq ákimdiktiń atynan syı-syıapattar jasaldy. Ár nárestege araba men kerýetter, kıim-keshekter, oıynshyqtar tabys etildi. Oblystyq densaýlyq saqtaý basqarmasynyń basshysy Muqan Egizbaevtyń aıtýynsha, sábıler aldaǵy ýaqytta da erekshe kútimge alynady. «Qazirgi tańda nárestelerdiń jaǵdaıy jaqsy. Medısınalyq kútim jasap, úılerine jaqsy jaǵdaıda shyǵaryp jatyrmyz. Budan bylaı ár otbasyna medbıke bólinetin bolady. Osy úshemderdiń jaǵdaıyn qarap, baqylaýda ustap otyratyn bolamyz»,- dedi Muqan Egizbaev.
Jyl basynan beri óńirde úsh úshem dúnıege kelgen. Eki ana Túrkistan qalasynda, taǵy bir ana Shymkent qalasyndaǵy oblystyq perınataldyq ortalyqta bosanǵan.
